დუშეთის მუნიციპალიტეტის გამგებელმა, ვაჟა ჩოხელმა მე-2 მსოფლიო ომის მონაწილე ადგილობრივ ვეტერანებს უმასპინძლა, ფაშიზმზე გამარჯვების დღე მიულოცა და მუნიციპალიტეტის სახელით დაასაჩუქრა.

დუშეთის მუნიციპალიტეტის გამგეობის პრესსამსახურის ინფორმაციით, გამგებელმა პარლამენტის მაჟორიტარ დეპუტატ ზაქარია ქუცნაშვილთან და დუშეთის მუნიციპალიტეტის საკრებულოს თავმჯდომარე გივი ზურაბაშვილთან ერთად, მეორე მსოფლიო ომში დაღუპულთა მემორიალი ყვავილებით შეამკო.

გამგეობის ცნობით, გამარჯვების 72-ე წლისთავისადმი მიძღვნილ ღონისძიებაზე, ვეტერანებისა და დაღუპული გმირების პატივსაცემად ადგილობრივმა ახალგაზრდებმა სხვადასხვა მუსიკალური ნომრები შეასრულეს და ლექსები წაიკითხეს. ვაჟა ჩოხელმა და ზაქარია ქუცნაშვილმა მონაწილეებსა და დამსწრე საზოგადოებას მადლობა გადაუხადეს, ისაუბრეს გამარჯვებაში ქართველების ღვაწლზე, ვეტერანთა კეთილდღეობისა და დაღუპულთა ხსოვნის მნიშვნელობაზე.

ღონისძიებას ადგილობრივ მოსახლეობასთან ერთად, ასევე ესწრებოდნენ დუშეთის მუნიციპალიტეტის გამგებლის პირველი მოადგილე ბექა ღარიბაშვილი, გამგეობის სხვდასხვა სამსახურის თანამშრომლები, საკრებულოს დეპუტატები, საქართველოს წითელი ჯვრის საზოგადოების დუშეთის დღის სოციალური ცენტრის მოხალისეები და ვეტერანთა საქმეთა სახელმწიფო სამსახურის მცხეთა-მთიანეთის სამმართველოს უფროსი გოჩა ნაყეური.

ღონისძიების შემდეგ, ადგილობრივი ხელისუფლების წარმომადგენლები დაბა ჟინვალში მცხოვრებ მეორე მსოფლიო ომის ვეტერანს, ხვთისო ლომაშვილს ესტუმრნენ, რომელსაც 9 მაისს 102 წელი შეუსრულდა. სტუმრებმა მას 9 მაისი მიულოცეს და საჩუქრები გადასცეს.