მიწის უცხო ქვეყნების მოქალაქეებზე გასხვისების საკითხთან დაკავშირებით პარლამენტის თავმჯდომარემ, ირაკლი კობახიძემ საკონსტიტუციო ცვლილებების პროექტის საყოველთაო-სახალხო განხილვაზე განაცხადა, რომ ხელისუფლებამ შუალედური მიდგომა აირჩია, რითაც „დაცული იქნება, ერთი მხრივ, ეკონომიკური ინტერესები და მეორე მხრივ, საერთო ეროვნული, სუვერენული ინტერესები“. ამის შესახებ გაზეთი „რეზონანსი“ სტატიას აქვეყნებს სათაურით - „ უცხოელებზე მიწის მიყიდვა აღარ აიკრძალება“.

„მიწის საკითხთან დაკავშირებით იყო მსჯელობა კომისიაში. იყო ორი რადიკალურად განსხვავებული პოზიცია. ერთი ნაწილის აზრით, უცხოელებზე მიწის გაყიდვა სრულად უნდა აკრძალულიყო, მეორე ნაწილი კი თვლიდა, რომ საერთოდ არ უნდა ყოფილიყო ეს საკითხი დარეგულირებული. ჩვენ ავირჩიეთ შუალედური მიდგომა და დღეს კონსტიტუცია აცხადებს, რომ მიწა არის განსაკუთრებული მნიშვნელობის რესურსი და ეს საკითხები მოწესრიგებული უნდა იყოს ორგანული კანონით“, განაცხადა კობახიძემ, რომლის განმარტებით, არსებობდა საკონსტიტუციო სასამართლოს გადაწყვეტილება, რომლის თანახმადაც უცხოელებზე მიწის გაყიდვის სრული აკრძალვა არაკონსტიტუციურად გამოცხადდა და შუალედური გადაწყვეტილება იმიტომ მიიღეს, რომ არაკონსტიტუციურ ნორმას ვერ დაადგენდნენ“.

„კონსტიტუციაში ჩნდება ახალი ნორმა, რომელიც იძლევა იმის საშუალებას, რომ სათანადოდ მოხდეს ამ საკითხის რეგლამენტაცია უკვე ორგანული კანონით და უფრო მეტიც, უკვე მზადდება შესაბამისი კანონპროექტი, რომლითაც სათანადოდ იქნება მოწესრიგებული ეს საკითხი. დაცული იქნება, ერთი მხრივ, ეკონომიკური ინტერესები და მეორე მხრივ, საერთო ეროვნული, სუვერენული ინტერესები. ეს იქნება უზრუნველყოფილი ჩვენი კონსტიტუციის ახალი რედაქციითა და იმ კანონით, რომელიც უახლოეს მომავალში იქნება მიღებული საქართველოს პარლამენტის მიერ“, განაცხადა პარლამენტის თავმჯდომარემ.

გაზეთის ცნობით, აღნიშნულ საკითხზე რამდენიმე ინიციატივა არსებობდა, მათ შორის „დემოკრატიული მოძრაობისა“ და „პატრიოტთა ალიანსის“ წინადადებები. მათი კანონპროექტების მიხედვით, უცხოეთის მოქალაქეებსა და მოქალაქეობის არმქონე პირებზე სასოფლო-საკეურნეო დანიშნულების მიწის საკუთრებაში გადაცემა უნდა აიკრძალოს. ამას კატეგორიულად ეწინააღმდეგებოდა როგორც ოპოზიციის ნაწილი, ისე არასამთავრობო ორგანიზაციების წარმომადგენლები.