საქართველოს პარლამენტის თავმჯდომარემ, საკონსტიტუციო კომისიის ხელმძღვანელმა, ირაკლი კობახიძემ გორში, საკონსტიტუციო ცვლილებების პროექტის საყოველთაო-სახალხო განხილვაზე განაცხადა, რომ „როდესაც საპარლამენტო სისტემაში პრეზიდენტს პირდაპირი წესით ირჩევ, აქ ჩნდება ძალიან დიდი დისბალანსი პრეზიდენტის ლეგიტიმაციასა და მის უფლებამოსილებებს შორის“ და დაამატა, რომ „საპარლამენტო სისტემაში ხშირად ხდება ისე, რომ ირჩევენ ოდიოზურ ფიგურებს პრეზიდენტის თანამდებობაზე“.

მან დაასახელა, თუ რა სახის პრობლემები შეიძლება წარმოიშვას საპარლამენტო სისტემის პირობებში პრეზიდენტის პირდაპირი წესით არჩევისას.

„პრეზიდენტს აქვს ძალიან შეზღუდული უფლებამოსილებები საპარლამენტო სისტემაში, თუმცა ძალიან მაღალი ლეგიტიმაცია, რაც ხშირად წარმოშობს პრობლემებს და ამ პრობლემებს ადასტურებს მათ შორის, ევროკავშირის ქვეყნების გამოცდილება. პრობლემები სხვადასხვა სახით შეიძლება იყოს გამოხატული. ერთ-ერთი არის კომპეტენციებთან დაკავშირებით მუდმივი დავა პრეზიდენტსა და მთავრობას შორის, რაც ევროკავშირის არაერთ ქვეყანაშიც კი დაფიქსირდა. მეორე პრობლემა მდგომარეობს იმაში, რომ პირდაპირი არჩევის წესის პირობებში, საპარლამენტო სისტემაში ხშირად ხდება ისე, რომ ირჩევენ ოდიოზურ ფიგურებს პრეზიდენტის თანამდებობაზე, ევროკავშირის ქვეყნებშიც კი. თამამად შეიძლება ითქვას შემდეგი: იქ, სადაც საპარლამენტო სისტემებში პრეზიდენტებს ირჩევენ არაპირდაპირი წესით, არსად სისტემური პრობლემა არ წარმოშობილა“, განცხადა ირაკლი კობახიძემ.