ჩრდილოეთ კორეამ ბალისტიკური რაკეტის მორიგი გამოცდა მოაწყო. როგორც BBC იუწყება, რაკეტა ჩრდილო-დასავლეთით მდებარე კუსონგის სიახლოვიდან გაუშვეს, ასეულობით მილის გავლის შემდეგ კი იაპონიის ზღვაში დაეშვა.

ეს კი იმ ფონზე მოხდა, როდესაც სამხრეთ კორეის ახლადარჩეული პრეზიდენტი საარჩევნო კამპანიას ჩრდილოეთთან უკეთესი მუშაობის პირობით ატარებდა. მუნ ძე-ინმა, გამარჯვებიდან მე-2 დღესვე, ფხენიანში ჩასვლის სურვილიც გამოხატა.

გასულ თვეს ჩრდილოეთ კორეამ ორი რაკეტა გამოსცადა, თუმცა წარუმატებლად.

უშიშროების საბჭოსთან გამართული საგანგებო შეხვედრის შემდეგ, მუნმა დაგმო ფხენიანის ქმედება.

„პრეზიდენტმა თქვა, რომ იმ დროს, როდესაც სამხრეთ კორეა ღია რჩება ჩრდილოეთ კორეასთან დიალოგის გამართვის შესაძლებლობისთვის, ეს მხოლოდ მაშინ იქნება შესაძლებელი, როდესაც ჩრდილოეთი აჩვენებს თავისი დამოკიდებულების ცვლილებას“, განაცხადა პრეზიდენტის პრესმდივანმა.

ჯერ კიდევ არ არის დადგენილი რაკეტის გადაადგილების ზუსტი მანძილი. იაპონიის თავდაცვის სამინისტროს თქმით, მან 2 000 კილომეტრის სიმაღლეზე იფრინა და ის, შესაძლოა, ახალი ტიპის რაკეტა იყოს, იუწყება „როიტერსი“.

შეერთებული შტატების წყნარი ოკეანის სარდლობამ განაცხადა, რომ რაკეტის ტიპი შეფასებულია, მაგრამ ფრენა არ იყო კონტინენტთშორის ბალისტიკურ რაკეტასთან თავსებადი, რომელსაც შეერთებული შტატების კონტინენტთან წვდომის დიაპაზონი ექნებოდა.

მიიჩნევენ, რომ ჩრდილოეთ კორეა ორი ტიპის კონტინენტთშორის ბალისტიკურ რაკეტას ავითარებს, მაგრამ ჯერჯერობით არც ერთი მათგანის გამოცდა არ მომხდარა, წერს BBC.

ამ დრომდე, არც ჩრდილოეთ კორეაში და არც ჩინეთში, ფხენიანის ერთადერთ მოკავშირე ქვეყანაში, კომენტარი არ გაკეთებულა.