თავდაცვის ყოფილი მინისტრის, ირაკლი ოქრუაშვილის განცხადებით, ყოფილი პრეზიდენტის მიხეილ სააკაშვილის გუნდში „იყო პოზიცია, რომ გირგვლიანის საქმეზე დაკავებულები იყვნენ პატარკაციშვილის პროპაგანდისტული მანქანის მსხვერპლი".

ოქრუაშვილმა ამის შესახებ სანდრო გირგვლიანის საქმეზე მიმდინარე სასამართლო პროცესზე დაკითხვისას განაცხადა, რომელზეც ბრალი მიხეილ სააკაშვილს აქვს წაყენებული.

„სააკაშვილი ცდილობდა გარკვეული პერიოდი ნეიტრალური პოზიცია დაეჭირა, მაგრამ მერე უკვე ისიც იმ პოზიციაზე იყო, რომ ეს იყო შემთხვევითობა და ახალაიას და მერაბიშვილს ამაში ბრალი არ მიუძღვით. ამბობდა მერაბიშვილზე და სხვებზე, რომ ამ ტიპის ადამიანის დასჯა გუნდის და ქვეყნის ჩამოშლას გამოიწვევსო. მთხოვდა კიდევაც, რომ დამელაპარაკა პატარკაციშვილთან, რათა ეს თემა მომეხსნა საინფორმაციო ბადიდან. გუნდში აქტიური პოზიცია ეკავა რამდენიმე ადამიანს, მათ შორის გიგა ბოკერიას, რომ არ უნდა დასჯილიყო არც ახალაია და არც მერაბიშვილი", განაცხადა ოქრუაშვილმა და დაამატა, რომ სააკაშვილს მასთან რამდენჯერმე ჰქონდა საუბარი გირგვლიანის მკვლელობაში ბრალდებულების შეწყალებაზე.

„მერაბიშვილი რომ აწუხებდა ამ ადამიანების შეწყალებაზე, მეკითხებოდა აზრს და გარკვეულ რჩევას ამ საკითხზე, რაზეც მე ნეგატიური რეაქციები მქონდა. შეწყალებაზე რამდენჯერმე მქონდა საუბარი. სააკაშვილს ჰქონდა დაკავებულებისთვის მიცემული სიტყვა, რომ გათავისუფლდებოდნენ პატიმრობიდან და ამ ადამიანებს სააკაშვილის სიტყვის სჯეროდათ. გუნდში იყო პოზიცია, რომ ეს ადამიანები იყვნენ პატარკაციშვილის პროპაგანდისტული მანქანის მსხვერპლი", განაცხადა თავდაცვის ყოფილმა მინისტრმა.