„ეს ყველაფერი ვერ უზრუნველყოფს იმ ნეგატიური გეგმის განხორციელებას, რომელიც ჰქონდათ პროვოკაციის ავტორებს. გაგრძელდება საყოველთაო-სახალხო განხილვა და ჩვენ გვექნება იმის საშუალება, რომ საზოგადოებას ვესაუბროთ საკონსტიტუციო ცვლილებებთან დაკავშირებით“, - ასე გამოეხმაურა საქართველოს პარლამენტის თავმჯდომარე 15 მაისს, ფილარმონიის დიდ საკონცერტო დარბაზში, კონსტიტუციური კანონის პროექტის საყოველთაო-სახალხო განხილვაზე განვითარებულ მოვლენებს.

როგორც დღეს გამართულ პრესკონფერენციაზე ირაკლი კობახიძემ განაცხადა, პროვოკაციის თავიდან არიდება მხოლოდ ხისტი ძალის გამოყენების საშუალებით იყო შესაძლებელი, თუმცა, წინასწარ გადაწყდა, რომ ხისტი ძალა არ ყოფილიყო გამოყენებული. 

„ძირითადად, ორი ჯგუფი გამოიკვეთა, რომელმაც სამწუხაროდ მოახერხა გუშინდელი თბილისში შეხვედრის ჩაშლა. რაც შეეხება იმას, თუ ვინ იდგა ამ ჯგუფების უკან, ამაზე დეტალებზე საუბარს მოვერიდები. გვაქვს ამასთან დაკავშირებითაც ინფორმაცია. კიდევ ერთხელ გავიმეორებ, რომ ეს იყო ორი ჯგუფი, რომელსაც წინასწარ ჰქონდა დაგეგმილი ასეთი პროვოკაცია და ზუსტად ამ სახით. ჩვენ გვქონდა წინასწარ ინფორმაცია ამის შესახებ. ჩვენ წინასწარ გადავწყვიტეთ, რომ არ გამოგვეყენებინა ხისტი ძალა. ერთადერთი ხისტი ძალის გამოყენების პირობებში იყო შესაძლებელი ასეთი პროვოკაციის თავიდან არიდება. ჩვენ გადავწყვიტეთ, არ გამოგვეყენებინა ხისტი ძალა და სამწუხაროდ, ეს პროვოკაცია შედგა. თუმცა, ეს ყველაფერი ბუნებრივია ვერ უზრუნველყოფს იმ ნეგატიური გეგმის განხორციელებას, რომელიც ჰქონდათ პროვოკაციის ავტორებს. გაგრძელდება საყოველთაო-სახალხო განხილვა და ჩვენ გვექნება საშუალება, რომ საზოგადოებას ვესაუბროთ საკონსტიტუციო ცვლილებებთან დაკავშირებით. ეს იქნება უზრუნველყოფილი სათანადოდ ჩვენი მხრიდან. ამაზე პასუხისმგებელია ხელისუფლება“, განაცხადა ირაკლი კობახიძემ.