საქართველოს პრეზიდენტი გიორგი მარგველაშვილი კამპანიის „კონსტიტუცია ყველასია“ ფარგლებში სულხან-საბა ორბელიანის სახელობის უნივერსიტეტის სტუდენტებს და პროფესორებს შეხვდა.

პრეზიდენტის ადმინისტრაციის ცნობით, შეხვედრისას საარჩევნო, მათ შორის, ბონუსის სისტემა, სახელმწიფო მოწყობის საკითხები, თვითმმართველობის მნიშვნელობა, უმაღლესი მთავარსარდლის ფუნქცია-მოვალეობები, ასევე კონსტიტუციის ახალი პროექტის სხვა საკითხები განიხლიეს. შეხვედრისას პრეზიდენტმა სტუდენტების და პროფესორების მოსაზრებებს მოუსმინა და მათ შეკითხვებს უპასუხა.

„მივესალმები იმ დისკუსიებს და ძალიან აქტიურ ჩართულობას, რომელიც არსებობს ამ საკითხებთან დაკავშირებით. სულ რამდენიმე პრინციპული თემაა, რომელიც ჩვენ უნდა გადავწყვიტოთ და, მათი გადაწყვეტის შემთხვევაში, ჩვენ შეიძლება მართლაც მნიშვნელოვანი დოკუმენტი შევქმნათ.

რა არის ეს: ჩემთვის ერთერთი ყველაზე პრინციპული საპარლამენტო არჩევნების სისტემაში ბონუსების თემაა, რომელიც საკონსტიტუციო კომისიამ წარმოგვიდგინა. საუბარია, რომ ეს ხმები სულ იმ ერთმა ძალამ უნდა წაიღოს, ვინც პირველ ადგილას გავიდა. ეს ჩემთვის პრინციპულად მიუღებელია, რადგან მიმაჩნია, რომ ყველაზე წმნიდა ამ პროცესში არის ხმის მიცემა. მთელი 25 წელი იმაზეა ლაპარაკი, რომ - დაიცავი შენი ხმა, არ წაგართვან ხმები, არ მოგატყუონ და უცებ გეუბნებიან, რომ შენ რომელ პარტიასაც მიეცი ხმა, იმ პარტიამ ვერ გადალახა 5%-იანი ბარიერი და მისი ყველა ხმა მიაქვს ერთ ვიღაცას. ეს პრინციპულად მიუღებელია“, აღნიშნა საქართველოს პრეზდენტმა.

ქვეყნის პირველი პირი პრეზიდენტის არჩევის წესსაც შეეხო და აღნიშნა, რომ პრეზიდენტის როგორც პირდაპირი, ასევე არაპირდაპირი არჩევის წესი დემოკრატიულია, თუმცა აუცილებელია გავითვალისწინოთ არსებული ტრადიცია და მისი შეცვლის შემთხვევაში, დასაბუთებულად აიხსნას ეს გადაწყვეტილება. გიორგი მარგველაშვილმა ყურადღება უმაღლესი მთავრსარდლის როლზეც გაამახვილა.

„პრეზიდენტს ასახელებ უმაღლეს მთავარსარდლად და ეს მნიშვნელოვანია, თუმცა მას უნდა ჰქონდეს შესაბამისი კომპეტენცია მართოს ქვეყანა არამხოლოდ ომის დროს, არამედ ომამდე კრიზისებში და არასაომარ დროსაც გააძლიეროს ქვეყნის თავდაცვისუნარიანობა.

მარტივად რომ შევხედოთ, წინა ხელისუფლება სტაბილური იყო, მაგრამ პრემიერ მინისტრი შეიცვალა სამჯერ. წარმოიდგინეთ ჯარმა სამჯერ უნდა სხვადასხვა პრემიერ მინისტრთან დადოს ფიცი და, მიუხედავად იმისა, რომ პრემიერ მინისტრი არის ხელისუფლების ძირითადი ბერკეტების მფლობელი, ჯარი, როგორც ერთობა ადამიანებისა, რომლებიც მზად არიან სამშობლოს საკუთარ სიცოცხლე მისცენ და კიდევ უფრო მეტიც - საკუთარ თავზე აიღონ სხვისი სიცოცოხლის ხელყოფის უფლება, ეს ადამიანები იმსახურებენ, რომ მათთვის შეიქმნას სტაბილური გარემო და მათი მხედართმთავარი, რომელიც მათ მისცემთ ბრძანებას, რომ ასეთი რისკის ქვეშ დააყენონ საკუთარი და სხვისი სიცოცხლე, ამ ნაწილში იყოს ძალიან გამართული, ეს საქართველოს მსგავს ქვეყანას განსაკუთრებით სჭირდება“, განაცხადა გიორგი მარგველაშვილმა.

სულხან-საბა ორბელიანის სახელობის უნივერსიტეტში გამართულ შეხვედრას საქართველოს პრეზიდენტის ადმინისტრაციის უფროსი გიორგი აბაშიშვილი, ეროვნული უშიშროების საბჭოს მდივანი დავით რაქვიაშვილი და პრეზიდენტის მრჩევლებიც ესწრებოდენენ.