დემოგრაფიული აღორძინების ფონდის თავმჯდომარის თამარ ჩიბურდანიძის განცხადებით, მაღალთიან რეგიონებში ქორწინებები წახალისდება.მისი თქმით, ამ მიზნით შესაძლოა, ახალდაქორწინებულ წყვილს სახელმწიფომ საცხოვრებელი ფართი, თანხა ან მცირე ბიზნესი გადასცეს, ამის შესახებ თამარ ჩიბურდანიძემ საინფორმაციო-ანალიტიკურ პორტალ „კვირას“ პრესკლუბში განაცხადა.


ჩიბურდანიძის განმარტებით, მაღალ მთაში ქორწინებების დაბალი მაჩვენებელი მძიმე სოციალური მდგომარეობითაა განპირობებული.


„მთიან რეგიონებში ქორწინებათა მაჩვენებლის მიხედვით ცუდი მდგომარეობაა. ძალიან ბევრი ბერბიჭა და შინაბერაა. ამ მაჩვენებლით ერთ-ერთ წინა ადგილზე დგას ყაზბეგი. როგორც გამოირკვა, დაუქორწინებლობის მიზეზი ეკონომიკური სიდუხჭირე და სოციალური პირობებია. ამიტომ ჩვენ ხელისუფლებასთან ერთად ვმუშაობთ იმაზე, რომ მთის კანონში ბევრი ისეთი წამახალისებელი ფაქტორი ჩაიდოს, რაც ამ ხალხს ოჯახის შექმნას გაუიოლებს. ბევრ ქვეყანაში ახალდაქორწინებულებს ერთჯერადი სახით დიდ ფულად ჯილდოს აძლევენ, ან საცხოვრებელი ფართით არის საჩუქარი, ან მცირე ბიზნესის დაწყებაში ეხმარებიან. ჩვენს გვსურს რამე მსგავსი წახალისება დავაწესოთ მაღალმთიან რეგიონებში. ვთქვათ, წყვილს რომ რაიმე მცირე ბიზნესი დავაწყებინოთ, ისინი უკვე ოჯახის შექმნას შეძლებენ“,- განაცხადა თამარ ჩიბურდანიძემ.


ჩიბურდანიძემ ასევე აღნიშნა, რომ შიდა მიგრაციის მაჩვენებელი ძალიან მაღალია. ამ კუთხით სამეგრელო ზემო სვანეთში, მცხეთა მთიანეთში ცუდი მდგომარეობაა, ასევე საქართველოს საზღვრისპირა ზოლი თითქმის მთლიანად დაცლილია.