თბილისში გაუჩინარებული აზერბაიჯანელი ჟურნალისტის, აფგან მუხტარლის მეგობრები და მეუღლე ვარაუდობენ, რომ ჟურნალისტი აზერბაიჯანულმა სპეცსამსახურებმა გაიტაცეს.

აღნიშნულთან დაკავშირებით, მათ დღეს პრესკონფერენცია გამართეს. აფგან მუხტარლის მეგობრის თქმით, ჟურნალისტი საქართველოში მუშაობდა საგამოძიებო მასალაზე, რომელიც აზერბაიჯანის პრეზიდენტ ილჰამ ალიევის ქონებას ეხებოდა, როგორც საქართველოში, ასევე ოფშორულ ზონებში.

„ის ძალიან აქტიური ჟურნალისტი იყო და სავარაუდოდ აზერბაიჯანის ხელისუფლებამ მასში საფრთხე დაინახა”, განაცხადა დაშგინ აღალარლიმ, რომელიც საეჭვოდ მიიჩნევს იმ გარემოებას, რომ საქართველოს სპეცსამსახურმა ეს ვერ შეამჩნია.

გაუჩინარებული ჟურნალისტის მეუღლე ლეილა მუსტაფაევა აცხადებს, რომ მის მეუღლეს უთვალთვალებდნენ, კონკრეტულად კი, მისი თქმით, კომპანია „სოკარში” არიან ადამიანები, რომლებიც თვალთვალს ახორციელებდნენ.

„საქართველოს დანაშაულიც არის, რომ აზერბაიჯანის უსაფრთხოების სამსახურის წევრები შემოუშვეს საქართველოში და ჩემი ქმარი მოატაცებინეს", აცხადებს ლეილა მუსტაფაევა.

„თბილისის ადამიანის უფლებათა სახლის” ინფორმაციით, აზერბაიჯანელი აქტივისტი და ჟურნალისტი აფგან მუხტარლი ბოლოს, 29 მაისს, დაახლოებით 19:00 საათზე თბილისში ნახეს. ის დაემშვიდობა თავის მეგობარს, რომელსაც ბარათაშვილის ქუჩაზე მდებარე კაფეში შეხვდა, დაურეკა მეუღლეს და უთხრა, რომ მალე მივიდოდა სახლში, თუმცა ამის შემდეგ, აღარავის უნახავს და მობილური გამორთული აქვს.

შინაგან საქმეთა სამინისტროს ცნობით, გაუჩინარებულ ჟურნალისტს ქვეყნის მასშტაბით ეძებენ.

აფგან მუხტარლი აზერბაიჯანიდან დევნილი საგამოძიებო ჟურნალისტი და აქტივისტია, რომელიც ღიად გამოხატავდა აზერბაიჯანის მთავრობის წინააღმდეგ მოსაზრებებს. 2015 წლის იანვრიდან ის საქართველოში მეუღლესთან და ქალიშვილთან ერთად ცხოვრობს.