სამაუწყებლო კომპანია „რუსთავი 2“-ის გენერალური დირექტორის ბრძანებით, არხზე რეორგანიზაცია გამოცხადდა. ინფორმაციას „საზოგადოებრივი მაუწყებელი“ ავრცელებს, რომლის ცნობითაც, ნიკა გვარამიას ბრძანების მიხედვით, ხელფასი 10-20% -ით შეუმცირდებათ არხის და გადაცემების ხელმძღვანელ პირებს, ასევე რეორგანიზაციის ფარგლებში მოხდება კადრების შემცირება.

რეორგანიზაციის პროცესი დაგეგმილია საინფორმაციო სამსახურშიც, რომელიც პირველ ივნისს დაიწყება და აგვისტოში დასრულდება.

„რუსთავი 2“-ის გენერალური დირექტორის მოადგილე ზაალ უდუმაშვილი კომენტარისგან თავს იკავებს და ამბობს, რომ ამ ეტაპზე მიმდინარეობს პროექტების დამუშავება და კომენტარის გაკეთება მიზანშეწონილად არ მიაჩნია.

არხზე უკვე დაიხურა გადაცემა „იღბლიანი ბორბალი“, როგორც ამის შესახებ თავად გადაცემის წამყვანებმა აცნობეს მაყურებელს, თუმცა უკავშირდება თუ არა ფაქტი არხზე შესაძლო რეორგანიზაციას, ჯერ უცნობია.