ამერიკის შეერთებული შტატების საგანგებო და სრულუფლებიანი ელჩი საქართველოში იან კელი გაერთიანებული ერების ორგანიზაციის 71-ე სესიაზე საქართველოს მიერ ინიცირებული რეზოლუციის - რომელიც აფხაზეთიდან და ცხინვალის რეგიონიდან იძულებით გადაადგილებულ პირთა და ლტოლვილთა დაბრუნებას ეხება - მხარდამჭერთა რიცხვის გაზრდას „ძალიან კარგ“ ფაქტად მიიჩნევს და აცხადებს, რომ „უაღრესად მნიშვნელოვანია, რომ მომავალშიც გავაგრძელოთ ყურადღების გამახვილება იმ სიძნელეებზე, რასაც იძულებით გადაადგილებული პირები საქართველოში აწყდებიან“.

„მათ მოუწიათ საცხოვრებლის დატოვება. აშშ ყოველთვის დაუჭერს მხარს ამ რეზოლუციას და ტერიტორიული მთლიანობის აღდგენას იმისთვის, რომ დევნილებს შესაძლებლობა ჰქონდეთ თავიანთ სახლებს დაუბრუნდნენ“, განაცხადა იან კელიმ, რომელიც რუსეთის მოსაზრებას, რომ აღნიშნული რეზოლუცია ეჭვქვეშ აყენებს ჟენევის დისკუსიების ფორმატს, არ ეთანხმება.

„ჟენევის ფორმატი ძალიან მნიშვნელოვანია, შეერთებული შტატები ამ ფორმატს მხარს უჭერს, რადგან ის არის დისკუსიების ძირითადი ადგილი, სადაც ხვდებიან მხარეები და კონფლიქტის მოგვარების საკითხებზე მსჯელობენ... თუმცა, ნებისმიერი რეზოლუცია, რომელიც მხარს უჭერს დევნილთა დაბრუნებას საკუთარ სახლებში, ვერ იქნება ამ ფორმატის ხელისშემშლელი. შესაბამისად, ასეთი მტკიცება, რომ ეს რეზოლუცია რამენაირად ეჭვქვეშ აყენებს ჟენევის მოლაპარაკებების ფორმატს, არასწორია და მე არ ვეთანხმები“, განაცხადა იან კელიმ.

ნიუ-იორკში, გაერო-ს გენერალურმა ასამბლეამ 71-ე სესიაზე საქართველოს მიერ ინიცირებული რეზოლუცია „აფხაზეთიდან, საქართველო და ცხინვალის რეგიონიდან/სამხრეთ ოსეთი, საქართველო იძულებით გადაადგილებულ პირთა და ლტოლვილთა სტატუსის შესახებ“ კიდევ ერთხელ მიიღო.

აფხაზეთიდან და ცხინვალის რეგიონიდან იძულებით გადაადგილებულ პირთა და ლტოლვილთა დაბრუნების მხარდამჭერმა დოკუმენტმა 80 ქვეყნის ხმა მიიღო. მხარდამჭერების რაოდენობა, წინა წელთან შედარებით, ოთხით გაიზარდა.

საქართველოს მხარდამჭერთა შორის არიან - იემენი, ურუგვაი, სან ტომე და პრინსიპი, გამბია და პაპუა ახალი გვინეა.

რაც შეეხება რეზოლუციის მოწინააღმდეგეებს, საზოგადოებრივი მაუწყებლის ცნობით, მათი რიცხვი, 2016 წელთან შედარებით, ერთით შემცირდა. ჩრდილოეთ კორეა და სუდანი კენჭისყრაში, წინა წლისგან განსხვავებით, არ მონაწილეობდნენ. ფილიპინების წარმომადგენელმა კი ხმა რეზოლუციის წინააღმდეგ მისცა.

შემცირდა იმ ქვეყნების რიცხვიც, ვინც კენჭისყრაზე თავს იკავებდა. თუ 2016 წელს ასეთი 64 ქვეყანა იყო, წელს თავი 61-მა შეიკავა.

საქართველოს მიერ ინიცირებული რეზოლუციის წინააღმდეგი 14 ქვეყანა წავიდა, კერძოდ - ბელარუსი, ბურუნდი, სომხეთი, კუბა, ლაოსი, ნაურუ, ნიკარაგუა, ფილიპინები, რუსეთი, სამხრეთ სუდანი, სირია, ვენესუელა, ვიეტნამი და ზიმბაბვე.