„Fine Gael“ -ის პარტიაში გამარჯვების მიღწევის შემდეგ, ლეო ვარადკარი ირლანდიის რესპუბლიკის პრემიერ მინისტრი გახდება.

როგორც BBC წერს, 38 წლის პოლიტიკოსი ირლანდიის მთავრობის პირველი ჰომოსექსუალი მეთაური და ამავე დროს ქვეყნის ისტორიაში ყველაზე ახალგაზრდა ლიდერი იქნება.

ვარადკარმა მისი მეტოქე, საბინაო მინისტრი საიმონ კოვენეი დაამარცხა. მან ხმების 60% მიიღო და უხელმძღვანელებს „Fine Gael“-ს - ყველაზე დიდ პარტიას კოალიციურ მთავრობაში.

იგი მემარჯვენე-ცენტრისტული პარტიის ლიდერის პოსტზე ენდა კენის რამდენიმე კვირაში შეცვლის.

ვარადკარი - ყოფილი ექიმი, ირლანდიელი ექთნის და ინდოელი ექიმის შვილია და როგორც BBC წერს, მედიის უმეტესობა მისი გამარჯვების შესახებ ინფორმაციების გავრცელებისას ძირითადად ვარადკარის ფესვებზე, ასაკზე და სექსუალურობაზე არის ფოკუსირებული.

ვარადკარმა მისალოცი წერილი უკვე მიიღო დიდი ბრიტანეთის პრემიერ მინისტრის, ტერეზა მეისაგან.