პოლიტოლოგი, საქართველოს ყოფილი პრემიერ მინისტრის, ბიძინა ივანიშვილის ყოფილი ეკონომიკური მრჩეველი გია ხუხაშვილი ქვეყნის პოლიტიკურ ცხოვრებაში „სრული ქაოსის“ და „ბარდაგის“ შესახებ საუბრობს და ამბობს, რომ იმ ფონზე, როცა პრემიერ მინისტრის, გიორგი კვირიკაშვილის სახით „გვყავს პოლიტიკური ლიდერი, რომელიც პოლიტიკაში არ ერევა“ და „არავინ იცის სად მიიღება გადაწყვეტილება“ – ცხოვრება „აბსურდის თეატრში“ ცხოვრებას დაემსგავსა.

აღნიშნულის შესახებ ხუხაშვილმა გაზეთ „ახალი თაობისთვის“ მიცემულ ინტერვიუში ისაუბრა.

„ქვეყანაში არის სრული ქაოსი. არ არსებობს არანაირი ვერტიკალი, არ არსებობს პოლიტიკური ცენტრი, მოკლედ არაფერი არ არსებობს, სრული „ბარდაგია“. არავინ იცის სად მიიღება გადაწყვეტილება და ვინ რას აკეთებს. მერე იწყება სისულელეების კომენტირება და ყველა სხვადასხვა რამეს ამბობს. ხელისუფლებაში ერთიანობა არ არსებობს. მეტიც - ხელისუფლებაში არ არიან ადამიანები, რომლებსაც პოლიტიკური აზროვნების უნარი აქვთ... ცალკე საუბრის თემაა გიორგი კვირიკაშვილი, ის არის მთავრობის მეთაური, მაგრამ პოლიტიკაში არ ერევა. წარმოგიდგენიათ, რა აბსურდის თეატრში ვცხოვრობთ, რომ გვყავს პოლიტიკური ლიდერი, რომელიც პოლიტიკაში არ ერევა! არ ვიცი, თავად არ უნდა, თუ უკრძალავენ, მაგრამ ფაქტია - ყველა ქმედებით ხაზს უსვამს, რომ არ ერევა. ამას არანაირი ახსნა არ აქვს გარდა იმისა, რომ ქვეყანაში სრული ქაოსია“, აცხადებს გია ხუხაშვილი.