კონგოში დატყვევებული ქართველი მფრინავის, სოსო ოსორაულის ოჯახის წევრებთან შეხვედრის დასრულების შემდეგ საქართველოს საგარეო საქმეთა მინისტრის მოადგილემ, ზვიად გონაძემ განაცხადა, რომ იოსებ ოსორაულის ტყვეობიდან დახსნასთან დაკავშირებით ქართული საგარეო უწყების მხრიდან ბოლო თვეებში ინტენსიური ქმედებები ხორციელდება, მაგრამ გაერო-ს მიერ გამოთქმული მოსაზრებით, „დიდი ალბათობით, იოსებ ოსორაული დაღუპულია“. მან აღნიშნა, რომ ოსორაულის ოჯახის წევრებს ბოლო სიახლეები მიაწოდეს.

„მივაწოდეთ ინფორმაცია, ერთის მხრივ, იმ სიახლეების შესახებ, რაც გაგვაჩნია დღეისთვის იოსებ ოსორაულის შესახებ, ხოლო მეორეს მხრივ, ჩავაყენეთ საქმის კურსში დეტალურად იმ ნაბიჯების შესახებ, რასაც საგარეო საქმეთა სამინსიტრო ბოლო თვეების განმავლობაში ინტენსიურად ახორციელებდა იოსებ ოსორაულის ტყვეობიდან დახსნასთან დაკავშირებით... ვინაიდან ფაქტობრივი დასტური არ არის, მხოლოდ შეიძლება სავარაუდოდ იყოს საუბარი, გაეროს მისიამ თავის წყაროებზე დაყრდნობით გამოთქვა მოსაზრება, რომ დიდი ალბათობით, იოსებ ოსორაული დაღუპულია“, განაცხადა ზვიად გონაძემ.

ქართულ საგარეო უწყებაში მიმდინარე შეხვედრა სოსო ოსორაულის ძმამ, პროტესტის ნიშნად დატოვა. მანამდე კი სოსო ოსორაულის მხარდამჭერი აქცია საგარეო საქმეთა სამინისტროს შენობასთან გაიმართა. ქართველი მფრინავის ოჯახის წევრები, თანასოფლელები და რიგითი მოქალაქეები სამინისტროს ხელმძღვანელობისაგან ოსორაულის ადგილმდებარეობის, ჯანმრთელობის მდგომარეობის დადგენასა და ტყვეობიდან დახსნას ითხოვდნენ.