„ერთ-ერთი ბიზნესმენი“, რომლის გატაცებასა და სავარაუდო გამტაცებელთა დაკავების შესახებ ინფორმაცია შინაგან საქმეთა სამინიტრომ გაავრცელა, სამშენებლო კომპანია „სვეტის" დამფუძნებელი გივი ჯიბლაძეა, რომელსაც გამტაცებლები ფიზიკური ანგარიშსწორების მუქარით სოლიდურ თანხას - შსს-ს ცნობით 150 000 აშშ დოლარს სძალავდნენ.

ინფორმაციას ამის შესახებ „რუსთავი 2“ ავრცელებს.

გივი ჯიბლაძე ყვება, რომ თბილისში, ყიფშიძის ქუჩაზე მდებარე სახლიდან გამოსვლის დროს გაიტაცეს. ბიზნესმენი ამბობს, რომ 4 გამტაცებელი მიკრო ავტობუსით გადაადგილდებოდა, რომლებმაც თავზე ტომარა ჩამოაცვეს და ერთ-ერთ ავტოსადგომზე გადაიყვანეს.

ჯიბლაძის თქმით, გატაცებას წინ უძღვოდა დაპირისპირება მოქანდაკე ზურაბ წერეთლის კომპანიის წარმომადგენლებთან. ჯიბლაძე ვარაუდობს, რომ სწორედ ამ კომპანიასთან დაკავშირებულმა პირებმა გაიტაცეს, თუმცა ბიზნესმენი ამბობს, რომ თავად ზურაბ წერეთელი არ იყო ამ ფაქტთან დაკავშირებით ინფორმირებული.

გივი ჯიბლაძის ინფორმაციით, რამდენიმე დღის წინ მის კაბინეტში სროლა იყო.

შსს-ს ცენტრალური კრიმინალური პოლიციის დეპარტამენტის ორგანიზებულ დანაშაულთან ბრძოლის მთავარი სამმართველოს თანამშრომლებმა გამოძალვისა და თავისუფლების უკანონო აღკვეთის ბრალდებით 4 პირი ორშაბათს, თბილისსა და მცხეთის მუნიციპალიტეტში ჩატარებული სპეცოპერაციების შედეგად დააკავეს.

„გამოძიებამ დაადგინა, რომ დაკავებულები ერთ-ერთ ბიზნესმენს 150 000 აშშ დოლარს სძალავდნენ და თავისი კუთვნილი 200 კვ.მ ფართის მათზე გადაფორმებას სთხოვდნენ. ამ მიზნით, ბრალდებულებმა ბიზნესმენს უკანონოდ აღუკვეთეს თავისუფლება, ფიზიკური ანგარიშსწორებით დაემუქრნენ და თანხის გადახდის პირობის სანაცვლოდ გაათავისუფლეს.

სამართალდამცველებმა ლ.ჩ. და ნ.ბ. თბილისში, ხოლო დ.ბ. და ნ.კ. მცხეთის მიმდებარე ტერიტორიაზე დააკავეს“, აღნიშნულია შსს-ს ინფორმაციაში.