მცხეთა-მთიანეთის გუბერნატორის თანამდებობიდან გოჩა ზეიკიძის წასვლას არ ადასტურებს მისი პირველი მოადგილე გურამ ამირიძე. როგორც მან Guardian.ge-ს სატელეფონო საუბრისას განუცხადა, ზეიკიძემ დილას ჩვეულებრივ ჩაატარა თათბირი, რის შემდეგაც თავად რეგიონში გავიდა და ამ წუთებამდე არ ფლობს ინფორმაციას გუბერნატორის პოსტის დატოვებასთან დაკავშირებით.

„ბატონ გოჩას ჯერ არ დაუწერია განცხადება. ის, როგორც მე ვიცი, გუბერნატორია. ბრძანება მე არ მინახავს. დღეს ერთად ვიყავით. მე ახლა რეგიონში ვარ გასული საქმეზე, უკან არ მივსულვარ, ჯერ გზაში ვარ, მანქანაში ვიმყოფები (გუბერნატორის პირველ მოადგილესთან სატელეფონო საუბარი დღის 04:00 საათზე შედგა). დილით ჩვეულებრივად ჩაატარა თათბირი, ჩვეულ რეჟიმში. როგორ გითხრათ, რა გითხრათ. არ მივსულვარ ჯერ ოფისში, რა გიპასუხოთ?!“ განაცხადა გურამ ამირიძემ.

Guardian.ge-ს შეკითხვაზე, რომ საუბარია გოჩა ზეიკიძის სხვა უწყებაში, კერძოდ სოფლის მეურნეობის სამინისტროში გადაყვანაზე, გურამ ამირიძე ასე პასუხობს: „აი, თქვენ უფრო მეტი იცით, ვიდრე მე. მართლა არაფერი ვიცი მეტი“.

მორიგ შეკითხვაზე, მოიაზრება თუ არა მისი კანდიდატურა მცხეთა-მთიანეთის გუბერნატორის პოსტზე, გურამ ამირიძემ თქვა: „ჩემი კანდიდატურა ნაღდად არ მოიაზრება და არ განიხილება. მე პირველ მოადგილედ ვრჩები“. 

სამშაბათ დილით გავრცელებული ინფორმაციის თანახმად, მცხეთა-მთიანეთის გუბერნატორმა გოჩა ზეიკიძემ თანამდებობა საკუთარი განცხადების საფუძველზე დატოვა. იგი საქმიანობას სოფლის მეურნეობის სამინისტროს დაქვემდებარებაში მყოფი კომპანიის, „მექანიზატორის“ დირექტორის მოადგილის პოსტზე განაგრძობს.