პრეზიდენტ ტრამპის ადმინისტრაციის ოფიციალურმა პირმა ხუთშაბათს განაცხადა, რომ პენტაგონი დაახლოებით 4, 000 ამერიკელ სამხედროს გააგზავნის ავღანეთში დამატებით, იმ იმედით, რომ გაარღვიოს გამოუვალი მდოგომარეობა ომში, რომელიც ახლა შეერთებული შტატების მესამე მთავარსარდლის ხელში გადავიდა. ეს იქნება ყველაზე მასშტაბური ამერიკული პირადი შემადგენლობის განლაგება დონალდ ტრამპის პრეზიდენტობის ამ ხანმოკლე პერიოდში.

„ასოშეიტედ პრესის“ თანახმად, თავდაცვის მდივნის, ჯეიმს მატისის გადაწყვეტილება გამოცხადდება არაუგვიანეს მომავალი კვირისა. ამერიკული ახალი ამბების სააგენტოს თქმით, ისლამისტი ექსტრემისტებისაგან მომდინარე მზარდმა საფრთხემ, რომელიც ავღანეთის დედაქალაქ ქაბულში განხორციელებული საშინელი თავდასხმებით კიდევ უფრო ნათელი გახდა, შეერთებული შტატების უფრო მძლავრი ქმედებების საჭიროების მოწოდებები წარმოშვა.

ტრამპიის ადმინისტრაციის ოფიციალურმა პირმა, რომელსაც გადაწყვეტილების დეტალებზე საჯაროდ ინფორმაციის გაცემის უფლებამოსილება არ გააჩნია და ანონიმურობის პირობით ისაუბრა, აღნიშნა, რომ დამატებითი ჯარები ავღანეთის შეიარაღებულ ძალებს გაწვრთნიან და რჩევებს გაუწევენ. უფრო მცირე ნაწილი კი თალიბანის და „ისლამური სახელმწიფოს“ წინააღმდეგ კონტრტერორისტული ოპერაციებისთვის იქნება გამოყოფილი.

აღნიშნულის შესახებ კომენტარისთვის თხოვნისას პენტაგონის პრესსპიკერმა ჯეფ დევისმა განაცხადა: „გადაწყვეტილება მიღებული არ ყოფილა“.

როგორც „ასოშეიტედ პრესი“ წერს, ტრამპმა მემკვიდრეობით მიიღო ამერიკის ყველაზე ხანგრძლივი კონფლიქტი, რომლის დასასრული და ამერიკელთა წარმატების განსაზღვრული სტრატეგია არ ჩანს, მიუხედავად იმისა, რომ შეერთებული შტატების ჯარების რაოდენობა გაცილებით მცირეა, ვიდრე ეს ბარაქ ობამას და ჯორჯ დაბლიუ ბუშის პრეზიდენტობებისას იყო. 2009 წელს ობამამ სანქცირება გასცა ავღანეთში დამატებით 30, 000 სამხედრო გაგზავნილიყო, რის შედეგადაც ჯარების მთლიანმა რიცხვმა 100, 000-ს გადააჭარბა, სანამ მისი დარჩენილი პრეზიდენტობის შემდგომ პერიოდში მოხდებოდა სამხედროების რაოდენობის შემცირება ავღანეთის მიწაზე.

ტრამპი ძნელად თუ საუბრობდა ავღანეთზე, როგორც კანდიდატი თუ პრეზიდენტი, და ამის ნაცვლად კონცენტრირებას აკეთებდა „ისლამური სახელმწიფოს“ ჯგუფის განადგურებაზე სირიასა და ერაყში. ორთავე მისი წინამორბედი იმედოვნებდა ავღანეთის ომში გამარჯვებას. ბუშმა 2001 წლის 11 სექტემბრიდან მალევე, მოკავშირეთა სამხედრო ძალების დახმარებით სწრაფი წარმატება მოიპოვა თალიბანზე, სანამ ამერიკა ერაყის ომში გადაერთვებოდა. ობამას პრეზიდენტობისას ავღანეთზე აშშ-ის ხელახალი ფოკუსირების მოხდენის შემდეგ, მოხერხდა ქვეყანაში ალ-ყაიდას ქსელის დიდი ნაწილის გაუვნებელყოფა, სანქცირებული მისიის შედეგად მოკლული იქნა ოსამა ბინ ლადენი, მაგრამ ობამა წარუმატებელი აღმოჩნდა ჩაექრო თალიბანის აჯანყება, წერს „ასოშეიტედ პრესი“.

მატისის მიერ ავღანეთში ჯარების განლაგება გაცილებით მცირე იქნება ვიდრე ეს ობამას ადმინისტრაციის დროს იყო.

ავღანეთში აშშ-ის ჯარების მეთაურმა, გენერალმა ჯონ ნიკოლსონმა განაცხადა, რომ ჯარები საჭიროა იმისათვის, რომ სათანადოდ გაწვრთნან და რჩევები მისცენ ავღანელ სამხედროებს. ავღანეთის ლიდერები კი, რომელთაც ბოლო თვეებში თალიბებთან მნიშვნელოვანი რაიონები დაკარგეს, ამერიკის უფრო მეტი ჯარების განლაგებას იწონებენ.

ხუთშაბათს ჯეიმს მატისმა აშშ-ის წარმომადგენლობით პალატაში კანონმდებლების წინაშე განაცხადა, რომ მიზნად „შერიგება“ რჩება, ისევე როგორც ავღანეთის მთავრობაში კორუფციის დონის შემცირება.

„ჩვენ არ ვუყურებთ წმინდა წყლის სამხედრო სტრატეგიას“, თქვა მან. „ყველა ომის დასასრული დგება. ჩვენი ამოცანაა დავასრულოთ ის რაც შეიძლება მალე“.

2001 წლის შემდეგ ავღანეთში თითქმის 2, 400 ამერიკელი სამხედრო დაიღუპა. გასულ შაბათ-კვირას სამი ამერიკელი ჯარისკაცი იქნა მოკლული და სხვა 1 დაჭრილი აღმოსავლეთ ავღანეთში თალიბანის მიერ განხორციელებული თავდასხმისას.