„რესპუბლიკური პარტიის“ ყოფილმა ლიდერმა და საქართველოს პარლამენტის ყოფილმა თავმჯდომარემ, დავით უსუფაშვილმა ახალი პოლიტიკური ძალის, „შენების მოძრაობის“ ჩამოყალიბების შესახებ განცხადების გაკეთებისას თქვა, რომ მათი მოძრაობა იქნება „მტკიცე თავის გეგმაში“.

„ჩვენ კალაპოტიდან ვერ ამოგვაგდებს მიმდინარე პოლიტიკური კონიუნქტურა, რომელმაც არაერთ პოლიტიკურ წამოწყებას შეუშალა ხელი საქმის კეთებაში. ჩვენ მტკიცე ნაბიჯებით გავივლით მარათონულ დისტანციას და 2020 წლის საპარლამენტო არჩევნებზე გავიმარჯვებთ“, განაცხადა დავით უსუფაშვილმა.

უსუფაშვილმა თქვა, რომ მის პოლიტიკურ გაერთიანებაში იქნებიან კახა შარტავა, რევაზ შავიშვილი და ვახტანგ ხმალაძე. მან ასევე დაასახელა პარტიის ახალი სახეები, რომლებიც მისი თქმით, „გაიზარდნენ ახალ, თავისუფალ საქართველოში და თავისუფალი არიან ჩვენი იმ წარსულის მავნე გადმონაშთებისგან, რომელიც არ ასვენებს ჩვენ ქვეყანას და არ გვაძლევს საშუალებას წინ წავიდეთ და გავაკეთოთ ის, რაც ქვეყანას სჭირდება“.