პარლამენტი მარიხუანასა და მცენარე კანაფთან დაკავშირებით კანონის ლიბერალიზაციის შესახებ მთავრობის, იუსტიციის სამინისტროს საკანონმდებლო პროექტის პირველი მოსმენით განიხილვას მმართველ პარტიაში აზრთა სხვადასხვაობა მოჰყვა. ჯანდაცვის კომიტეტის თავმჯდომარის, მცხეთის მაჟორიტარი დეპუტატის, დიმიტრი ხუნდაძის თქმით, პროექტი "თეორიულად კარგი, პრაქტიკულად კი ხიფათის შემცველია". 

კანონპროექტის მიხედვით იცვლება მცენარე კანაფის დიდი და განსაკუთრებით დიდი ოდენობის, ხოლო მარიხუანას დიდი ოდენობის განსაზღვრება. მცენარე კანაფის შემთხვევაში, დიდი ოდენობა 50 გრამის ნაცვლად, განისაზღვრება 140 გრამის ოდენობით, ხოლო განსაკუთრებით დიდი ოდენობა 250 გრამის ნაცვლად 1000 გრამით. მარიხუანას შემთხვევაში, დიდი ოდენობა 50 გრამის ნაცვლად, განისაზღვრება 70 გრამით, ხოლო ნედლი მარიხუანას შემთხვევაში, 100 გრამის ნაცვლად 140 გრამის ოდენობით.

აქედან გამომდინარე ცვლილებები შედის ასევე „სისხლის სამართლის კოდექსში“, „ადმინისტრაციულ სამართალდარღვევათა კოდექსში“ და „ნარკოტიკული დანაშაულის წინააღმდეგ ბრძოლის შესახებ“ კანონში, რომლის თანახმად, დიდ ოდენობამდე ნარკოტიკული საშუალების შემცველი მცენარის უკანონო დათესვის, მოყვანის ან კულტივაციისათვის სასჯელის სახედ აღარ გამოიყენება თავისუფლების აღკვეთა. ასევე, იმავე ქმედების დამამძიმებელ გარემოებებში ჩადენისთვის ალტერნატიულ სანქციებთან ერთად გათვალისწინებულია მოქმედ რეჟიმთან შედარებით გაცილებით ნაკლები ზომის თავისუფლების აღკვეთა.