პრემიერ მინისტრმა ტერეზა მეიმ ბრიუსელში ევროპის კავშირის სამიტზე ევროპის ლიდერებს ხუთშაბათს უთხრა, რომ ევროკავშირის ნებისმიერ მოქალაქეს, რომელიც დიდ ბრიტანეთში 5 წლის განმავლობაში ცხოვრობდა, ახალი სტატუსი, „ევროკავშირის მოსახლის სტატუსი“ მიეცემა.

ახალი საემიგრაციო სტატუსი მათ იმის უფლებას მიანიჭებს, რომ „ბრექსიტის“ შემდეგ (დიდი ბრიტანეთის ევროკავშირიდან გასვლის შემდეგ) დარჩნენ დიდ ბრიტანეთში და მიიღონ ჯანდაცვა, განათლება და სხვა სარგებლები.

როგორც BBC იუწყება, აღნიშნული გეგმა 3.2 მილიონ ევროკავშირის მოქალაქეს შეეხება, რომელიც ახლა დიდ ბრიტანეთში ცხოვრობს.

ტერეზა მეიმ აღნიშნულ თემაზე საუბრისას მკაფიოდ გაუსვა ხაზი იმას, რომ წინადადება მხოლოდ მაშინ იქნება მიღებული, თუკი ანალოგიური უფლებები მიენიჭებათ დიდი ბრიტანეთის მოქალაქეებს ევროკავშირის სხვა სახელმწიფოებში.