საჯარო სამსახურში ნეპოტიზმის კრიმინალიზების შესახებ საკანონმდებლო ინიციატიცაზე იმსჯელებენ დღეს პარლამენტში. ადამიანის უფლებათა დაცვის კომიტეტმა არასამთავრობო ორგანიზაცია „საერთაშორისო გამჭვირვალობის “  მიერ წარდგენილი წინადადების შესახებ საბოლოო გადაწყვეტილება დღეს უნდა მიიღოს.


„საერთაშორისო გამჭირვალობის“ საპარლამენტო მდივანი ლიკა საჯაია აცხადებს, რომ მათი საკანონმდებლო ინიციატივის თანახმად, საჯარო სამსახურში კონკურსის წესის დარღვევა, რაც გამოიხატება კონკურსის წესების განზრახ დარღვევაში, კონკრეტული კანდიდატისათვის უპირატესობის მინიჭებასა და ასევე კონკურსის ჩაშლაში, სისხლის სამართლებრივი დევნის საფუძველი იქნება.


„დაისჯებიან ის საჯარო პირებიც, ვინც კონკურსის წესის დარღვევით მიიღებენ  კონკრეტულ პირს სამსახურში  და ის პირებიც, ვინც დაიკავებენ თანამდებობას.   თუ პირი აკმაყოფილებს კონკურსის წესებს და არის რომელიმე საჯარო მოხელის ნათესავი, რასაკვირველია არ დაისჯება. მხოლოდ და მხოლოდ დაისჯება კონკურსის წესის დარღვევისთვის,“ - აღნიშნავს ლიკა საჯაია და განმარტავს, თუ რა კონკრეტული ქმედებები იქნება გატარებული კანონდამრღვევისთვის.


„ეს ნორმა შეიცავს სამ ნაწილს. პირველი ნაწილი: დაისჯება ნებისმიერი პირი, ვინც კონკურსის წესს დაარღვევს, ამ შემთხვევაში არის გათვალისწინებული ჯარიმა; თანამდებობის ჩამორთმევა და ასევე თავისუფლების აღკვეთა.  მეორე ნაწილი უკვე ეხება პოლიტიკური პირებს, ამ შემთხვევაში სასჯელი მკაცრდება. თავისუფლების აღკვეთა ვადით სამ წლამდე და ჯარიმა აღარ გვხვდება. უფრო მსუბუქად ისჯება ის ადამიანი, რომელიც დაიკავებს ამ თანამდებობას. ამ შემთხვევაში გათვალისწინებულია ჯარიმა და თავისუფლების აღკვეთა ერთ წლამდე ვადით,“ აცხადებს საჯაია.