ახალციხის მერი ქალაქისთვის ერთ-ერთ მტკივნეულ საკითხად საბინაო ფონდის არქონას ასახელებს და ამბობს, რომ უსახლკაროთა და სხვადასხვა პრობლემის მქონე ადამიანების საბინაო უზრუნველყოფა შეუძლებელი ხდება, ამ ფონზე კი, როგორც ვლადიმერ ზედინიძე აცხადებს, ძველი, საბჭოთადროინდელი შენობები, რომელიც თავდაცვის და შინაგან საქმეთა სამინისტროების ბალანსზე იმყოფება, სადღეისოდ უფუნქციოდაა დარჩენილი, არადა მათი ქალაქის ხელმძღვანელობის შეხედულებისამებრ გამოყენება 370-ზე მეტ ოჯახს მოუგვარებდა საბინაო პრობლემებს.

„თავშესაფარი არსებობს, გვაქვს, მაგრამ ეს თავშესაფარია და არა საცხოვრებელი. თავშესაფარი ნიშნავს, რომ დავუშვათ ქუჩაში დატოვებული ადამიანი ერთი ან ორი დღით მიიყვანო. ასეთი ადამიანები რომ ჩავასახლოთ, ასეთი ფონდი არ გვაქვს. ამ საკითხის გადაწყვეტა არის შესაძლებელი და ჩვენ არაერთი წერილი გვაქვს გაგზავნილი - ეს ეხება ძირითადად თავდაცვისა და შინაგან საქმეთა სამინისტროებს - ფლობენ იმ ტერიტორიებს და შენობა-ნაგებობებს, რომლებიც ადრე საბჭოთა კავშირის შეიარაღებულ ძალებს ეკუთვნოდა. არის კიდევ ადგილი, რომელსაც 11-ბინიანებს ვეძახით, დასახლებაა და თავდაცვის სამინისტრო ტერიტორიაა. ასევე არის ყოფილი სასაზღვრო ნაწილის ტერიტორია, სადაც ხეები ამოვიდა შენობებზე და ინგრევა. ჩვენთვის ეს იქნებოდა კარგი საშუალება, რომ შეგვექმნა საბინაო ფონდი. იმ 370-ზე მეტ ოჯახს, რომელსაც არ გააჩნია ბინა და აქვს პრეტენზია ჩვენდამი, ამ საკითხს გადავწყვეტდით და მოვაგვარებდით. თუ გადმოგვეცემოდა, იქნებოდა შანსი, რომ მთელი რიგი პროექტები განგვეხორციელებინა“, აცხადებს Guardian.ge-სთან საუბრისას ქალაქ ახალციხის მუნიციპალიტეტის მერი ვლადიმერ ზედგინიძე და ამატებს:

„კულტურის სახლის პრობლემა შეიძლება გადავწყვიტოთ. შენობა არის იქ, სადაც შესაძლებელია, რომ თუნდაც 15 ოჯახს გამოვუყოთ საცხოვრებელი ფართები. მთავარია, ტერიტორია და მასზე განთავსებული შენობა-ნაგებობები გადმოეცეს ქალაქს და დანარჩენს ჩვენი ფინანსებით შევძლებთ. ერთადერთი განვითარების შანსი ახალციხეს ამ ტერიტორიაზე აქვს, დანარჩენი სულ კერძო სტრუქტურებზეა გადასული, გაყიდულია“.