ხონის კულტურის ცენტრის მცირე დარბაზში ექიმისა და პოეტის, მერაბ კვიცარიძის პოეზიის საღამო გაიმართა.

ხონის მუნიციპალიტეტის გამგეობის ცნობით, პოეტის შემოქმედებიდან ლექსები, კულტურის ცენტრთან არსებული ლიტერატურული სალონის მოსწავლეებმა, ცენტრის მსახიობებმა და პოეტის კოლეგებმა წაიკითხეს.

„საკუთარი შემოქმედებიდან რამდენიმე ლექსი თვით მერაბ კვიცარიძემ წაიკითხა, პროფესიული საქმიანობის დროს მომხდარი კურიოზული შემთხვევები გაიხსენა და დამსწრე საზოგადოების შეკითხვებს უპასუხა.

ღონისძიების დასასრულს, ექიმმა და პოეტმა ღონისძიების ორგანიზატორებს და დამსწრე საზოგადოებას მადლობა გადაუხადა. ღონისძიებაში მონაწილე ყველა ბავშვს კი საჩუქრად, მთელი ცხოვრების მანძილზე საკუთარ კლინიკაში უფასო მომსახურეობა და თურქეთის ერთ-ერთ ქალაქში ექსკურსია შესთავაზა.

მერაბ კვიცარიძეს თავისი საქმიანობით ქვეყნის მასშტაბით იცნობენ, ექიმი, პოეტი, ზურაბ გორგილაძის პრემიის ლაურიატი, ქველმოქმედი, საპატიო ქუთაისელი და „დაგვიანებული ცისფერყანწელი“ „ცისფერყანწელთა“ ქალაქიდან. ასევე არის პროექტის „საქართველო წერს „ვეფხისტყაოსანს“ ავტორი.

ღონისძიების ორგანიზტორები კულტურის სახლის დირექცია, ლიტერატურული წრის ხელმძღვანელი გულიადა სანოძე და გაზეთ „ხონის „ რედაქტორი მაია ფეიქრიშვილი იყვნენ", აღნიშნულია ხონის გამგეობის მიერ გავრცელებულ ინფორმაციაში.