ამერიკის შეერთებული შტატების პრეზიდენტმა, დონალდ ტრამპმა განაცხადა, რომ ჩრდილოეთ კორეასთან „სტრატეგიული მოთმინების“ წლებმა მარცხი განიცადა და ახლა „გაბედული და მტკიცე პასუხის“ დროა.

„ჩვენ ერთად ვდგავართ უგუნური და მხეცური რეჟიმის საფრთხის წინაშე“, განაცხადა ტრამპმა ვაშინგტონში სამხრეთ კორეის პრეზიდენტთან, მუნ ძე-ინთან გამართულ პრესკონფერენციაზე.

ტრამპმა მოუწოდა ჩრდილოეთ კორეას „აირჩიოს უკეთესი გზა... სწრაფად“.

განცალკევებით, მუნმა განაცხადა, რომ საჭიროა გაგრძელდეს ჩრდილოეთ კორეის ლიდერის დიალოგში ჩართვის მცდელობები.

როგორც BBC იუწყება, სამხრეთ კორეის პრეზიდენტმა აღნიშნა, რომ მისმა ქვეყანამ უნდა გაატაროს თავდაცვის რეფორმები და განაგრძოს უნარიანობის გაზრდა თავისი თავის დასაცავად.

მუნმა განაცხადა, რომ ტრამპთან მოლაპარაკებებისას ჩრდილოეთ კორეა მთავარი საკითხი იყო და ხაზი გაუსვა, რომ „მხოლოდ მძლავრ უსაფრთხოებას შეუძლია მოიტანოს ნამდვილი მშვიდობა“ აზია-წყნარი ოკეანის რეგიონში.

თეთრ სახლში საუბრისას ტრამპმა განაცხადა, რომ „ჩრდილოეთ კორეის რეჟიმთან სტრატეგიული მოთმინების ერამ მარცხი განიცადა, ბევრი წელია, რაც მან მარცხი განიცადა“ და დაამატა: "გულწრფელად რომ ვთქვათ, მოთმინების ფიალა ამოწურულია“.

შეერთებული შტატების ლიდერმა თქვა, რომ ვაშინგტონი „მჭიდროდ მუშაობს სამხრეთ კორეასთან, იაპონიასთან, ისევე როგორც პარტნიორებთან მსოფლიოს გარშემო, დიპლომატიური, უსაფრთხოების და ეკონომიკური ზომების სფეროებში, რომ დავიცვათ ჩვენი მოკავშირეები და ჩვენი მოქალაქეები ამ საფრთხისაგან, რომელიც ჩრდილოეთ კორეად არის ცნობილი“.