„ქართული ოცნების“ დამფუძნებელი, ყოფილი პრემიერ მინისტრი, ბიძინა ივანიშვილი 2017 წლის თვითმმართველობის წინასაარჩევნო კამპანიაში არ ჩაერთვება. ივანიშვილი სავარაუდოდ, არც კახა კალაძის თბილისის მერის კანდიდატად ოფიციალურად წარდგენის ღონისძიებას დაესწრება.

აღნიშნულს „ქართული ოცნების“ პოლიტსაბჭოს სხდომის დასრულების შემდეგ, სადაც თბილისის მერობის კანდიდატად ვიცე-პრემიერი კახა კალაძე დამტკიცდა, მმართველი პარტიის დეპუტატები და პოლიტსაბჭოს წევრები ადასტურებენ.

ზვიად კვაჭანტირაძის თქმით, „ბიძინა ივანიშვილი პოლიტიკდან წასულია“. „იგი თვლის დღეს, რომ „ქართულ ოცნებას“ არ უჭირს იმისთვის, რომ იგი აქტიურად ჩაებას „ქართული ოცნების“ საარჩევნო კამპნაიაში... თუ იგი ჩათვლის ამას საჭიროდ, ჩვენ ყოველთვის სიხარულით მივეგებებით მის გააქტიურებას, მაგრამ მე არა მგონია, რომ ამის აუცილებლობა იყოს“, უთხრა „რუსთავი 2“ -ს კვაჭანტირაძემ.

იგივეს აცხადებს ფრაქცია „ქართული ოცნების“ თავმჯდომარე მამუკა მდინარაძე.

„ბატონი ბიძინა, ბუნებრივია, მოწვეული უნდა იყოს დღევანდელ ღონისძიებაზე. მე ნამდვილად არ მაქვს ინფორმაცია, ის დაესწრება თუ არა დღევანდელ წარდგენას ბატონი კახის, მთაწმინდის პარკში, თუმცა იმაზეც გიპასუხებთ, ჩაერთვება თუ არა. ამის შესახებ იყო განცხადებები - არ ჩაერთვება. კონკრეტულად, თუ ჩაერთვება, ბუნებრივია ეს პოზიტივის მეტს არაფერს მოუტანს ჩვენს პარტიას“, განუცხადა ჟურნალისტებს მდინარაძემ.

ბიძინა ივანიშვილის 2017 წლის თვითმმართველობის წინასაარჩევნო კამპანიაში ჩართვასთან დაკავშირებით ანალოგიური შეფასება გააკეთა პარლამენტის ჯანდაცვის კომიტეტის თავმჯდომარემ და „ქართული ოცნების“ პოლიტსაბჭოს წევრმა, აკაკი ზოიძემ.

„ბატონმა ბიძინამ მე მგონი ძალიან მკაფიოდ განაცხადა, რომ არ ღებულობს მონაწილეობას წინასაარჩევნო კამპანიაში. ჩემი აზრით, „ქართული ოცნება“ არის ძალა, რომელსაც უნარი შესწევს რომ წარმართოს ეს კამპანია ღირსეულად და ჩემი აზრით, კახი კალაძე არა მარტო უალტერნატივო კანდიდატურაა „ქართული ოცნების“ შიგნით, არამედ, მე მგონი უალტერნატივო კანდიდატურა არის მერის პოსტზე საერთოდ“.

დედაქალაქში „ქართული ოცნების“ წინასაარჩევნო გზავნილი „ჩემი ოცნების თბილისი“ იქნება.