ე.წ. ელიავას ბაზრობის დღევანდელი ფორმით შენარჩუნებას მიუღებლად მიიჩნევს თბილისის საკრებულოს წევრი უმრავლესობიდან ჯაბა სამუშია, რომლის განცხადებითაც საკითხი, თუ როგორ უნდა განვითარდეს აღნიშნული ტერირორია, ჯერჯერობით განხილვის თემაა, მაგრამ დედაქალაქის ცენტრში, წარმოუდგენელია „ამ სახით დარჩეს რამდენიმე ჰექტარი მისწის ნაკვეთი“.

„არის კერძო საკუთრება, კერძო სივრცე და შესაძლებელია მოხდეს საკმაოდ კარგი შეთავსება იმისა, რომ რაღაც ტერიტორია, რომელიც დღეს არის საკმაოდ შეუხედავი და საკმაოდ მძიმე სანახავი, ამ ტერიტორიაზე შევქმნათ თანამედროვე სტილის, ვთქვათ, ამ შემთხვევაში სავაჭრო ტერიტორია, სავაჭრო ცენტრი, რომელსაც ექნება ასევე ძალიან კარგი, ასე ვთქვათ, საჯარო სივრცე, იქვე. ეს არის განხილვის საგანი, ეს არ არის ჯერ გამოტანილი ფართო მსჯელობისათვის და ვფიქრობ, რომ ამ კუთხით როგორც კი დაიდება კონკრეტული დოკუმენტი, იმის მიხედვით შეგვიძლია ჩვენ ეს ვიმსჯელოთ. მაგრამ, კიდევ ვამბობ, რომ იმ სახით, რა სახითაც დღეს ელიავას ბაზრობა არის... შეიძლება, ნორმალურ ქალაქში ამ სახით დარჩეს რამდენიმე ჰექტარი მიწის ნაკვეთი?“, თქვა სამუშიამ „პალიტრა ნიუსის“ ეთერში.