კრემლში რუსეთის პრეზიდენტ ვლადიმერ პუტინსა და ჩინეთის პრეზიდენტ ქსი ძინპინგს შორის მოლაპარაკებები გაიმართა.

ლიდერებმა ორმხრივი ურთიერთობები და მსოფლიოში არსებული მდგომარეობა განიხილეს. უფრო ადრე ისინი ერთმანეთს კრემლში არაფორმალურ სადილზე შეხვდნენ. სამშაბათსვე სრული ფორმატის მოლაპარაკებები გაიმართა. დაგეგმილია 40 დოკუმენტზე ხელმოწერა და ორი განცხადების მიღება.

როგორც „რია ნოვოსტი“ იტყობინება, პუტინმა დღევანდელ შეხვედრას „გადამწყვეტი“ უწოდა ორმხრივი ურთიერთობების განვითარებისათვის. მისი სიტყვებით, გაფართოებულ ფორმატში მიმდინარე მოლაპარაკებები საშუალებას მისცემს დეტალურად იქნეს განხილული ყველაზე მეტად საჭირბოროტო საკითხები.

მან ასევე აღნიშნა, რომ ეკონომიკური თანამშრომლობის საკითხები ყოველთვის მოსკოვის და პეკინის ყურადღების ცენტრში იმყოფება. ამიტომ მნიშვნელოვანია, ქვეყნებმა გააერთიანონ ძალისხმევა საერთაშორისო არენაზე და უსაფრთხოების საკითხების მიმართულებით.

„სასიამოვნოა აღვნიშნო, რომ თუკი გასულ წელს ჩვენ ვიხილეთ მოკრძალებული, მაგრამ მაინც ზრდა საქონელბრუნვის მხრივ, მიმდინარე წელს ეს უკვე წარმოადგენს მნიშვნელოვან მაჩვენებელს - 37%-ს 4 თვეში“, დაამატა პუტინმა.

თავის მხრივ, ჩინეთის ლიდერმა განაცხადა, რომ საერთაშორისო საგარეო პოლიტიკური მდგომარეობის ცვლილება რუსეთის და ჩინეთის ურთიერთობებზე არ აისახება.

მისი აზრით, მოსკოვი და პეკინი ეფექტურად თანამშრომლობენ საერთაშორისო საკითხებზეც, მიუხედავად მსოფლიოში არსებული „რთული ცვლილებებისა“.

ქსი ძინპინგმა შეახსენა საზოგადოებას, რომ თავისი უფლებამოსილების შედგომიდან რუსეთის ლიდერს 22-ჯერ შეხვდა. მან მოსკოვის და პეკინის ურთიერთობებს ორი მსხვილი სახელმწიფოს კეთილმეზობლური ურთიერთობების მაგალითი უწოდა.

ჩინეთის სახალხო პარტიის მეთაურმა გამოხატა რწმენა, რომ მისი ვიზიტი „სრული წარმატებით“ დაგვირგვინდება.

„ჩვენ მრავალ საკითხზე მოვილაპარაკეთ... ვთვლი, რომ ჩვენი ინტენსიური კონტაქტები მოემსახურება ჩინურ-რუსული ყოვლისმომცველი პარტნიორობის განვითარებას და მაღალ დონეზე აყვანას“, დაამატა ძინპინგმა.