განათლებისა და მეცნიერების მინისტრის თამარ სანიკიძის განცხადებით, არასრულწლოვნების მიმართ, რომლებიც სირიაში წავიდნენ, პედაგოგები რაიმე სახის მინიშნებას, რომ შესაძლოა ასეთი გადაწყვეტილება მიეღოთ, ვერ აკონკრეტებენ.


ამის შესახებ თამარ სანიკიძემ ჟურნალისტებს პანკისიდან სირიაში სკოლის მოსწავლეების წასვლასთან დაკავშირებულ საკითხზე საუბრისას განუცხადა.


"რაც შეეხება პრობლემას, ძალიან მჭიდროდ ვთანამშრომლობთ შესაბამის უწყებებთან იმისათვის, რომ ასეთი მოვლენების მინიმალიზირება მოხდეს და შევძლოთ თავიდან ავიცილოთ ასეთი ქმედებები. რა თქმა უნდა, სკოლის დონეზე რა სამუშაოებიცაა ჩასატარებელი, ყოველთვის ტარდება. უშუალოდ ის ბავშვები, არასრულწლოვნები, რომლებმაც გადალახეს საზღვარი და წავიდნენ სირიაში, კონკრეტულად ამ მოსწავლეების მიმართ რაიმე სახის გადაცდომას ან მინიშნებას, რომ შესაძლოა ამ ბავშვებს ასეთი გადაწყვეტილება მიეღოთ, ნამდვილად ვერ აკონკრეტებენ პედაგოგები. თუმცა, ეს იმას არ ნიშნავს, რომ ჩვენ უნდა შევწყვიტოთ მუშაობა იმ კუთხით, რა კუთხითაც ვმუშაობთ. პირიქით, უნდა გავაძლიეროთ და აუცილებელია კავშირი შესაბამის ორგანოებთან", - განაცხადა თამარ სანიკიძემ და დაამატა, რომ რომ ყველა ის სტანდარტული სამუშაო, რომელიც ამ შემთხვევაში საჭიროა, მიმდინარეობს.