დუშეთის მუნიციპალიტეტის გამგეობის საინფორმაციო განყოფილება გამგეობის საქმიანობის შესახებ ტელეკომპანია „რუსთავი 2"-ის სიუჟეტს სპეციალური განცხადებით ეხმაურება.

გამგეობაში ტელეკომპანიის სიუჟეტს საზოგადოების შეცდომაში შეყვანის მცდელობად აფასებენ, რაც მათი განცხადებით, ადგილობრივი თვითმმართველობის არჩევნებს უკავშირდება.

„მიმდინარე წლის 4 ივლისს, ტელეკომპანია „რუსთავი 2"-ის საინფორმაციო გამოშვება ,,კურიერში’’ დუშეთის მუნიციპალიტეტის გამგეობის საქმიანობის  შესახებ გასული სიუჟეტის თაობაზე, საინფორმაციო განყოფილება მიზანშეწონილად მიიჩნევს, გაცნობოთ, რომ ტენდენციური ტელევიზია „რუსთავი 2" მათთვის ჩვეული ფორმით აგრძელებს საზოგადოების შეცდომაში შეყვანის მცდელობას, რაც უკავშირდება მოახლოებულ არჩევნებს. თუმცა, მათი მცდელობა ვერ გადაფარავს დუშეთის მუნიციპალიტეტის წარმატებული საქმიანობის შედეგებს.

ვაცნობიერებთ, რა ადგილობრივი თვითმმართველობის განხორციელების პროცესში მოქალაქეთა ჩართულობისა და ინფორმირებულობის მნიშვნელობას, დუშეთის მუნიციპალიტეტის გამგეობის საქმიანობა სრულად გამჭვირვალეა, ნებისმიერ დაინტერესებულ პირს შეუძლია დეტალურად გაეცნოს სასურველ ინფორმაციას მუნიციპალიტეტის გამგეობის საქმიანობის შესახებ.  

მივიჩნევთ,  რომ აღნიშნულ  სიუჟეტში დარღვეულია ჟურნალისტური ეთიკის ქარტიის პრინციპები - სიზუსტის,  დადასტურებული წყაროებისა და ფაქტების განზრახ დამახინჯების შესახებ, იკვეთება მიზანმიმართული კამპანია ადგილობრივი ხელისუფლების წინააღმდეგ და არ ვაპირებთ  აღნიშნულთან დაკავშირებით პოლემიკაში ჩართვას", ნათქვამია დუშეთის მუნიციპალიტეტის გამგეობის მიერ გავრცელებულ განცხადებაში.