საქართველოს პრემიერ მინისტრმა, გიორგი კვირიკაშვილმა მისი მთავრობის მიმართ ოპოზიციის მხრიდან ოკუპაციის თემასთან დაკავშირებით გაჟღერებულ ბრალდებებს უპასუხა და აღნიშნა, რომ ხელისუფლებას „არც ერთი წუთი არ გაუტარებია, რომ ეს საკითხი არ ყოფილიყო ნომერ პირველი ჩვენს დღის წესრიგში“. მან ხაზი გაუსვა, რომ „135 სოფელი, როგორც ამას ცდილობს წარმოაჩინოს ჩენი ოპოზიცია, ოპოზიციის ნაწილი, გახლავთ დაკარგული არა მცოცავი ოკუპაციის შედეგად, არამედ ოკუპაციის შედეგად“.

„ოკუპაცია რომ არის ძალიან მძიმე პრობლემა, ამაზე ჩვენ ბევრჯერ გვისაუბრია. შემიძლია გითხრათ, რომ ვცდილობ, ემოციის გარეშე ვუყურო იმ ბრალდებებს, რომელსაც ადგილი აქვს ჩვენი ხელისუფლების მიმართულებით, მაგრამ ეს თანდათან უფრო და უფრო ძნელი ხდება. ჩვენს ხელისუფლებას არც ერთი წუთი არ გაუტარებია, რომ ეს საკითხი არ ყოფილიყო ნომერ პირველი ჩვენს დღის წესრიგში“, აღნიშნა პრემიერ მინისტრმა და ოპოზიციას „აბსოლუტურად უსაფუძვლო ჭორების“ გავრცელებაში დასდო ბრალი.

„ჩვენი ოპონენტები ამაზე ავრცელებენ ჩვენს პარტნიორებთან აბსოლუტურად უსაფუძვლო ჭორებს, რომ ჩვენ ეს საკითხი თითქოსდა აღარ გვაქვს პირველი და თავიანთი სხვადასხვა გამოკითხვის მეშვეობით ცდილობენ, ეს საკითხი გადაიტანონ მეორე, მესამე და ა.შ. შრეში. შემიძლია გითხრათ, რომ აშშ-ის ვიცე-პრეზიდენტთან საუბრისას, ეს იყო ჩემი უმთავრესი თემა. მე იქ ხაზგასმით აღვნიშნე - ბატონო ვიცე-პრეზიდენტო, არ დაიჯეროთ არც ერთი კვლევის, რომელიც აჩვენებს, რომ ოკუპაცია და ტერიტორიული მთლიანობის საკითხი არის მეორე, მესამე ან უფრო ქვედა რიგის საკითხი. ყოველთვის, რაც არ უნდა მოხდეს საქართველოში, რანაირი წარმატებაც არ უნდა იყოს, ეს დარჩება ნომერ პირველი საკითხი ჩვენი მოსახლეობის ცნობიერებაში. ეს იყო ჩემი სიტყვები. მინდა, ეს თქვენ იცოდეთ, რადგან ეს არის სიმართლე“, განაცხადა კვირიკაშვილმა, რომლის თქმითაც „135 სოფელი, როგორც ამას ცდილობს წარმოაჩინოს ჩვენი ოპოზიცია, ოპოზიციის ნაწილი თუ გნებავთ, გახლავთ დაკარგული არა მცოცავი ოკუპაციის შედეგად, არამედ ოკუპაციის შედეგად“.

„ოკუპაცია გახლავთ ის მძიმე მემკვიდრეობა, რომელიც ჩვენმა პოლიტიკურმა ძალამ მიიღო, როდესაც ჩვენ მოვედით ხელისუფლებაში. ჩვენ ყველაფერს გავაკეთებთ იმისათვის, რომ ამ მძიმე მემკვიდრეობისგან გავათავისუფლოთ ჩვენი მომავალი თაობა და ჩვენ აუცილებლად გადავდგამთ იმ ნაბიჯებს, რომელიც მიგვიყვანს საქართველოს ერთიანობამდე - მშვიდობით, რა თქმა უნდა და მხოლოდ და მხოლოდ მოლაპარაკებების გზით და რა თქმა უნდა, ჩვენ არავითარ შემთხვევაში აღარ მივცემთ არავის საშუალებას, იმ ადამიანებს, და ადამიანები არ იცვლებიან, რომლებმაც 26 წელი ჩაკეტილ წრეზე ატარეს ჩვენი ქვეყანა, ისევ ამ წრეზე შეგვიყვანონ. ეს არის გამორიცხული. ჩვენ აუცილებლად, ძნელია, მაგრამ ცივი გონებით, გადავდგამთ იმ ნაბიჯებს, რომლებიც ამ პრობლემას მოაგვარებს“, თქვა პრემიერ მინისტრმა.