ლონდონის „ქამდენის დახურულ ბაზრობაზე“ მდებარე დიდ შენობაში ცეცხლი გაჩნდა. როგორც კი საგანგებო სამსახურში სატელეფონო შეტყობინება შევიდა, შემთხვევის ადგილისკენ თავდაპირველად 8 სახანძრო მანქანა და დაახლოებით 60 მეხანძრე იქნა გაგზავნილი, თუმცა სახანძრო ბრიგადა მალევე 10 მანქანამდე და 70 მეხანძრემდე გაიზარდა.

როგორც ბრიტანული „ინდიფენდენტი“ ლონდონის სახანძრო სამსახურზე დაყრდნობით იტყობინება, „ბაზრობის შიგნით მდებარე შენობას ცეცხლი უკიდია და იგი მოდებულია შენობის პირველ, მეორე და მესამე სართულებზე, ისევე როგორც სახურავის ნაწილზე... და ცეცხლის გაჩენის მიზეზი ამ ეტაპზე უცნობია“.

„ინდიფენდენტის“ ცნობით, ცეცხლი სწრაფად ვრცელდებოდა და ადგილობრივი დროით დილის სამი საათისთვის (თბილისის დროით დილის 6 საათი) მეხანძრეები ჯერ კიდევ ებრძოდნენ ცეცხლს, რომელიც ამ დროისთვის უკვე ლოკალიზებულია.