„ლეიბორისტული პარტიის“ თავმჯდომარე შალვა ნათელაშვილი საქართველოს ყოფილი პრემიერ მინისტრის, ბიძინა ივანიშვილის ჯანმრთელობის მდგომარეობასთან დაკავშირებით განცხადებას აკეთებს და ირწმუნება, რომ „ივანიშვილი ინსულტირებული, პარალიზებული და სრულიად ქმედუუნაროა“.

„ჩვენი ინფორმაციით, ქვეყნის დე ფაქტო მმართველი დიქტატორი ივანიშვილი ინსულტირებული, პარალიზებული და სრულიად ქმედუუნაროა... სადაც ივანიშვილი მკურნალობს, ჩაბრძანდა „გაზპრომის“ მმართველი მილერი, პუტინის სახელით და შეეცადა გაეგებინებინა მისი გარემოცვისა თუ მისთვის, რომ გადააბაროს ძალაუფლება სხვა ოლიგარქს, არანაკლებ ქურდსა და ყაჩაღს, ამ შემთხვევაში საუბარია კალაძეზე. პროცესს დაემთხვა პუტინის მრჩეველთა მასობრივი შემოსვლა საქართველოში, მათ მიერ თათბირების ჩატარება საკუთარ აქტივთან“, განაცხადა შალვა ნათელაშვილმა საგანგებო ბრიფინგზე. 

ნათელაშვილი ვარაუდობს, რომ „მილიონერთა უპატრონოდ დატოვებულ ბანაკში დაიწყება სასტიკი ბრძოლა ძალაუფლებისა და ხალხის ქონების შემდგომი გადანაწილებისათვის“.

„მე ვურჩევ ივანიშვილს თუ აქვს ამის უნარი გამოვიდეს და ახსნას მის მიერ შექმნილი ქაოსიდან გამოსვლის გზები. მოვუწოდებ ყველა პოლიტიკურ ძალას, გავერთიანდეთ ახალი საპარლამენტო არჩევნების მოთხოვნით, რათა ქვეყანამ მიიღოს ახალი, ეფექტური ხელისუფლება. ესაა უმძიმესი კრიზისიდან გამოსვლის ერთადერთი გზა, სხვა ყველაფერი არის კოსმეტიკური ცვლილებები, დღეს ეს სჭირდება საქართველოს“, აღნიშნა ნათელაშვილმა.