„მათ ერთადერთი ამოცანა აქვთ, კრემლის კარზე ჩაანაცვლონ ის ქართველი პოლიტიკოსები, რომლებიც მანამდე უფრო პოპულარულები იყვნენ მოსკოვისთვის“, აღნიშნული განაცხადება თავდაცვის ყოფილმა მინისტრმა, თინა ხიდაშელმა, „პატრიოტთა ალიანსის" წევრების დღეს დუმაში დაგეგმილ შეხვედრებთან დაკავშირებით გააკეთა.

როგორც მან „რუსთავი 2"-თან საუბრისას აღნიშნა, იგი ფიქრობს, რომ საქართველოს ეს შეხვედრა სარგებელს არ მოუტანს.

„ალბათ, გვექნება მორიგი კადრები „პაკლონაია გორადან“ რუს პოლიტიკოსებთან ერთად, ამჯერად პატრიოტთა ალიანსის პოლიტიკოსების. ეს არის ერთადერთი შედეგი, რომელსაც ეს ვიზიტი მოიტანს. თუკი მანამდე ჩვენ რუსეთში მოსიარულე მხოლოდ არასაპარლამენტო პოლიტიკური ძალები გვყავდა, სამწუხაროდ, ახლა საპარლამენტო ტრიბუნით მოსარგებლე პოლიტიკური ძალაა. ეს რუსეთისთვის ძალიან სასარგებლოა, ჩვენი ქვეყნისთვის ამაში სარგებელი არაფერია“, განაცხადა თინა ხიდაშელმა.