თურქეთში სახელმწიფო გადატრიალების მცდელობიდან ერთი წელი გავიდა. 2016 წლის 15 ივლისს მომხდარი მოვლენები დღეს მედიის წარმომადგენლებთან თურქეთის ელჩმა საქართველოში, ზექი ლევენთ გუმრუქჩუმ გაიხსენა.
ელჩმა მომხდარს თურქეთის ისტორიაში ყველაზე საშინელი ღალატის ფაქტი უწოდა და აღნიშნა, რომ „ხალხი თავდადებული გმირობის ფასად დაუპირისპირდა შეიარაღებულ დაჯგუფებას და მათ მიერ ქუჩაში გამოყვანილ ტანკებს. მათ მნიშვნელოვანი ისტორიული ფურცელი გადაშალეს ჩვენი ქვეყნის ისტორიაში".
„იმ ღამეს თურქი ხალხის მიერ გადახდილი გადასახადების საფუძველზე თურქეთის შეიარაღებულ ძალებში მოკალათებულმა პირებმა, რომლებსაც სამხედრო ტანსაცმელი ეცვათ, გამოიყენეს შეიარაღება, ტანკები, თვითმფრინავები საკუთარი ხალხის წინააღმდეგ მაშინ, როდესაც მათი ფუნდამენტური მოვალეობა საკუთარი ხალხის დაცვა იყო. ყოველივე ამის შედეგად, დაიღუპა 250 ადამიანი, 2500-ზე მეტი დაშავდა. ზოგიერთი მათგანი კვლავ საავადმყოფოში რჩება და მკურნალობას განაგრძობს. ჩვენ პირველად შევეჯახეთ ისეთ ფაქტს, როდესაც დაჯგუფებამ დაბომბა პარლამენტის შენობა, შეიარაღებული თავდასხმა განახორციელა საკუთარი ხალხისა და სახელმწიფო უწყებების წინააღმდეგ. ეს დღე თურქეთის რესპუბლიკისთვის იყო ერთგვარი სამამულო ომი. ეს გადატრიალების მცდელობა წარმატებული რომ ყოფილიყო, სავარაუდოდ, დღეს ვეღარ იარსებებდა ათათურქის მიერ დაარსებული თურქეთის რესპუბლიკა. ჩვენი ხალხი თავდადებული გმირობის ფასად დაუპირისპირდა შეიარაღებულ დაჯგუფებას და მათ მიერ ქუჩაში გამოყვანილ ტანკებს. მათ მნიშვნელოვანი ისტორიული ფურცელი გადაშალეს ჩვენი ქვეყნის ისტორიაში. ჩვენმა ხალხმა იმ დღეს დაამტკიცა, რომ არ არსებობს იმაზე უფრო დიდი ძალა, ვიდრე ხალხია და ხალხი არის დემოკრატიის ყველაზე მტკიცე მხარდამჭერი და დამცველი“, განაცხადა გუმრუქჩუმ, რომლის თქმით, გადატრიალებასთან კავშირში მყოფ პირთა უმრავლესობა მართლმსაჯულების წინაშე წარსდგა, ხოლო თავდაპირველი აზრი, რომ გადატრიალების ორგანიზატორი ფეთჰულაჰ გიულენი და ტერორისტული ორგანიზაცია იყო, შემდგომი სამართლებრივი პროცესებისას დადასტურდა.
თურქეთის ელჩმა გაიხსენა, რომ გადატრიალების მცდელობის შემდეგ პირველი უცხოური დელეგაცია, რომელიც თურქეთში ჩავიდა, ქართული დელეგაცია იყო, რაც მისივე თქმით, ქვეყნისთვის უპირობო და მტკიცე მხარდაჭერის გამოხატულებას წარმოადგენდა.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIAN.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
ამერიკის შეერთებული შტატების არჩეულმა პრეზიდენტმა დონალდ ტრამპმა ჯანდაცვისა და სოციალური მომსახურების მდივნად ვაქცინაციის მიმართ სკეპტიკურად განწყობილი რობერტ ფიცჯერალდ კენედი უმცროსი, პრეზიდენტ ჯონ კენედის ძმისშვილი დაასახელა, რითაც დაასრულა დიდი ხნის მითქმა-მოთქმა კენედის გარშემო იმის შესახებ, თუ რა თანამდებობას დაიკავებდა იგი ტრამპის ადმინისტრაციაში.