საქართველოს ყოფილი შინაგან საქმეთა მინისტრის კობა ნარჩემაშვილის განცხადებით, „ნაციონალურ მოძრაობასთან“ დაპირისპირება ხელისუფლებისთვის კრახი იქნება და ისინი ყველაფერს გააკეთებენ, რომ ქვეყანაში დესტაბილიზაციის მცდელობა ჰქონდეთ. მან ეს განცხადება, გაზეთ „ახალ თაობასთან“ საუბრისას გააკეთა.


მისივე თქმით, დღესაც, ხელისუფლება თუ რაიმეში სცოდავს, ისაა, რომ ისინი ერთ რამეს ვერ ხვდებიან, რომ ამ ადამიანებთან დაპირისპირება ყოფნა-არყოფნის საკითხია მათთვისაც და ქვეყნისთვისაც.


„ხელისუფლებისთვის „ნაციონალებთან“ დაპირისპირება კრახი იქნება. ისინი ყველაფერს გააკეთებენ, რომ ქვეყანაში დესტაბილიზაციის მცდელობა ჰქონდეთ. მათთვის პოლიტიკაში ყოფნა პოლიტიკისათვის არ არსებობს. ეს მათთვის მიუღებელია. ეს არის მტაცებლური ფორმა.


მთავარია ის, რომ პოლიტიკური დღის წესრიგი, რომელსაც „ნაციონალური მოძრაობა“ ადგენს, იქნეს იგნორირებული.


ყოველ დილას „ნაციონალური მოძრაობა“ და მის მიერ კონტროლირებადი მედიასაშუალება საზოგადოებას თავის დღის წესრიგს სთავაზობს, მერე ჩვენ, მთელი მედია, პოლიტიკოსები და ექსპერტები ამას ვუნდებით. ეს კურსი უნდა შეიცვალოს. დღეს სხვა რამეა მთავარი, თუ ხელისუფლება მოუნდება ამ დისკუსიას „ნაციონალურ მოძრაობასთან“, მაშინ ძვირფასი დრო გავა და საკეთებელი საქმე არ გაკეთდება.


სააკაშვილი რომ ცუდია და ჩვენ უკეთესები ვართ, ეს ამბავი უნდა ჩაბარდეს წარსულს და პოლიტიკის დღის წესრიგი უნდა შეიცვალოს“,-განაცხადა ნარჩემაშვილმა.


მისივე თქმით, ხელისუფლების ყველაზე მთავარი შეცდომა ისაა, რომ „ნაციონალური მოძრაობის “ მიერ დატოვებული მიდგომების მძევალი გახდა.


ამიტომ, მისი მოსაზრებით, ხელისუფლება არაპოპულარული გადაწყვეტილებების მიღებას ერიდება, როდესაც გამოსავალი სწორედ ამ გადაწყვეტილებაშია.