უკრაინის პრეზიდენტის პეტრო პოროშენკოს განცხადებით, საქართველოს ყოფილი პრეზიდენტის მიხეილ სააკაშვილის ექსტრადირებასთან დაკავშირებით მის მიერ გაკეთებული განცხადების შემდეგ, მან ინფორმაცია გადაამოწმა, უკრაინამ ექსტრადირებაზე უარყოფითი პასუხი გასცა და დამატებითი ინფორმაცია მოითხოვა. პოროშენკომ ამავე დროს თქვა, რომ ვიზიტის დროს, არ განუხილავთ სააკაშვილის ექსტრადირების საკითხი, მაგრამ „თუ დადასტურდება კრიმინალი, ცხადია, მოვიქცევით შესაბამისად“.

„სამწუხაროდ, არ ვიცოდი ამის შესახებ, მაგრამ მოხარული ვარ, რომ ეს საკითხი პრეზიდენტის ჩარევის გარეშე განიხილება. ახლა გადავამოწმე ინფორმაცია და უკრაინამ გასცა ექსტრადირებაზე უარყოფითი პასუხი და მოითხოვა დამატებითი ინფორმაცია. ჩვენ არ განგვიხილავს ექსტრადირების საკითხი ვიზიტის დროს, მაგრამ თუ ეს მომავალში მოხდება, ეს იქნება ძალოვანი სტრუქტურების და გენერალური პროკურორის პრეროგატივა, რომელიც ძალიან ყურადღებით განიხილავს ნებისმიერი დამნაშავის ექსტრადირების მოთხოვნას და ჩვენ დიდი სიამოვნებით ვითანამშრომლებთ საქართველოსთან ნებისმიერი დანაშაულის გამოძიებაში. თუმცა, მე ამაში არ ვერევი. პერსონალურად არავინ განგვიხილავს, მათ შორის არც სააკაშვილი. ზოგადად სახელებს და გვარებს არ აქვს მნიშვნელობა, თუ დადასტურდება კრიმინალი, ცხადია, მოვიქცევით შესაბამისად“, განაცხადა პეტრო პოროშენკომ საქართველოს „საზოგადოებრივ მაუწყებელთან“ ექსკლუზიურ ინტერვიუში.

საქართველოს ყოფილი პრეზიდენტის მიხეილ სააკაშვილის ექსტრადირების მოთხოვნით საქართველოს მთავარმა პროკურატურამ უკრაინის პროკურატურას 2015 წელს მიმართა, თუმცა პოროშენკომ მანამდე განაცხადა, რომ უკრაინას სააკაშვილის ექსტრადირების შესახებ საქართველოს ხელისუფლებისგან მოთხოვნა არ მიუღია და „შესაბამისად, ეს საკითხი არ განხილულა“.