ვიცე პრემიერი საგარეო საქმეთა მინისტრი მიხეილ ჯანელიძე საგარეო ურთიერთობათა საკითხებში პრეზიდენტის მრჩევლის, თენგიზ ფხალაძის მიერ გაკეთებულ განცხადებას ეხმაურება.

ჯანელიძე ფხალაძის განცხადებას, რომ პარლამენტის თავმჯდომარემ დიპოლმატურ კორპუსს პარტიული დავალებები მისცა, უსაფუძვლოს უწოდებს და მიიჩნევს, რომ პრეზიდენტის ადმინისტრაციის მხრიდან ხდება „ამბასადორიალის" პოლიტიზება.

„ძალიან დასანანია, რომ პრეზიდენტის ადმინისტრაციის მხრიდან ხდება სწორედ ამ საკითხის და, ზოგადად, "ამბასადორიალის" პოლიტიზება. მე კიდევ ერთხელ მოგახსენებთ, რომ "ამბასადორიალის" ფარგლებში არსებობს შესაძლებლობა ყველა აზრის გამოხატვის და მოსმენის. ჩვენ ვისაუბრეთ სამოქალაქო საზოგადოების მოხსენებებზე, მათი პოზიციების გაცნობაზე და ა.შ. ამიტომ ეს განცხადება არის სრულიად უსაფუძვლო და ემსახურება სწორედ ამ პროცესის პოლიტიზებას. მინდა მოვუწოდო დანარჩენ პირებს, რომლებიც ასევე გამოეხმაურნენ ამ უსაფუძვლო განცხადებას, რომ საგარეო საქმეთა სამინისტრო დღეს არის სრულიად დეპოლიტიზებული. საგარეო საქმეთა სამინისტრო ასრულებს თავის მოვალეობას მსოფლიოს მასშტაბით და დღეს ჩვენ გვქონდა დიდი პატივი, გვემასპინძლა პარლამენტის თავმჯდომარისთვის, რომელმაც ძალიან მნიშვნელივანი რეფორმების შესახებ გააცნო ინფორმაცია ჩვენს დიპლომატებს, მათ შორის, საკონსტიტუციო რეფორმის შესახებ, რომელიც ძალიან მნიშვნელოვანი რეფორმაა და ეს ინფორმაცია მოსმენილი პირველწყაროდან, კომისიის თავმჯდომარისგან იყო უმნიშვნელოვანესი ჩვენი დიპლომატებისთვის", განაცხადა ჯანელიძემ.

თენგიზ ფხალაძე პარლამენტის თავმჯდომარის მიერ საკონსტიტუციო პროცესთან დაკავშირებით ელჩებისადმი გაკეთებულ მიმართვას „ელჩებისთვის პარტიული დავალებების მიცემას“ უწოდებს.

მისი თქმით, ის, რომ დიპლომატიურ კორპუსს პარტიული დავალებები არ ეძლევა, დემოკრატიულ სახელმწიფოში საგარეო პოლიტიკის წარმოების ანაბანაა.

კობახიძემ „ამბასადორიალი 2017“-ის პანელში - „დემოკრატიული განვითარება“ მიიღო მონაწილეობა და საკონსტიტუციო რეფორმის მიმდინარეობის პროცესის, ასევე, დოკუმენტის შინაარსის შესახებ ისაუბრა.