თბილისის ერთ-ერთი მთავარ ქუჩაზე, პეკინზე ავტოსანტრანსპორტო მოძრაობის ცალმხრივი რეჟიმის შესაძლო დაწესებასთან დაკავშირებით მოსაზრებას გამოხატავს სამოქალაქო საზოგადოების ერთი ნაწილი, რომელიც მიმართავს მერიას, რომ „მოხდეს დაგეგმილი ცვლილების დაინტერესებული მხარეებისა და სპეციალისტების ჩართულობით დამატებით შესწავლა და შესაბამისი შედეგების საზოგადოებისთვის გაცნობა“.

ოთხი სამოქალაქო ორგანიზაცია: „სამოქალაქო ორგანიზაციების პარტნიორობა საგზაო უსაფრთხოებისთვის“, „იარე ფეხით“, „თბილისის ველომოყვარულთა კლუბი“ და „ალიანსი უსაფრთხო გზებისთვის“ სხვადასხვა ქვეყნის ქალაქების გამოცდილებიდან გამომდინარე აცხადებს, რომ „განიერ ქუჩაზე ცალმხრივი მიმართულების დაწესების შემდეგ იმატებს ავტომობილების რაოდენობა, სიჩქარე, და ინტენსივობა, ისევე როგორც იზრდება ხმაური, ვიბრაცია და ჰაერის დაბინძურების დონე, ხოლო ტროტუარებზე მცირდება ქვეითების რაოდენობა“. მათი აზრით, დაგეგმილმა ცვლილებებმა პეკინის ქუჩაზე, რომელიც ქალაქში ერთ-ერთი ყველაზე დატვირთული და ცოცხალი ქუჩაა, მოსალოდნელია, რომ უარყოფითად იმოქმედოს არა მხოლოდ ქუჩის მცხოვრებლებსა და ქვეითებზე, არამედ მასზე განლაგებულ ბიზნეს ობიექტებზეც.

„ქალაქების დაგეგმარების მსოფლიოში აღიარებული პრინციპების გათვალისწინებით, ურბანულ ზონებში მჭიდროდ დასახლებულ, დატვირთულ და განიერ ქუჩებზე პრიორიტეტი უნდა გახდეს საფეხმავლო ზონების გაფართოება, უსაფრთხოების კუნძულების მოწყობა, სწრაფი ავტობუსების ხაზის გამოყოფა და ავტობუსების გაჩერებების მოწყობა. ასეთ ქუჩებზე მაქსიმალურად იზღუდება პარკირება და ის ფასიანია.

ქალაქ თბილისში სატრანსპორტო გეგმის არ არსებობის პირობებში, პეკინის ქუჩაზე საავტომობილო ნაკადებისთვის ცალმხრივი მიმართულების დაწესება მნიშვნელოვნად შეცვლის სატრანსპორტო მოძრაობას ქალაქში. შესაბამისად, საკითხი მოითხოვს დამატებით შესწავლას, როგორც ტრანსპორტის სპეციალისტების, ურბანისტების, გენგეგმის ჯგუფის წარმომადგენლებისა და ინჟინრების მხრიდან, ასევე სხვა დაინტერესებული მხარეების ჩართულობით. გაცალმხრივების შემთხვევაში მიზანშეწონილია განივი კვეთის ქუჩებში და მიმდებარე ტერიტორიებზე მცხოვრები ადამიანების, როგორც ქვეითების, ისე მძღოლების გადაადგილების შესაძლო მარშრუტების სიღრმისეული ანალიზი. ასევე მნიშვნელოვანია, მოხდეს აღნიშნული ცვლილების ტრანსპორტის მოდელირების პროგრამით შესწავლა“, მიაჩნიათ სამოქალაქო ორგანიზაციების წარმომადგენლებს, რომელთაც მერიისადმი მიმართვის ტექსტი Guardian.ge-ს ელექტრონული ფოსტის მეშვეობით მიაწოდეს.