თბილისში, აღმაშენებლის გამზირზე „ქართველთა მარშის“ მხარდამჭერებმა, რომლებიც სკანდირებდნენ „მოღალტე“, „ევროპული საქართველოს“ მიერ მოწყობილი აქციის მონაწილეებს კვერცხები და წყლის ბოთლები ესროლეს, თუმცა ამას ხელი არ შეუშლია აქციის მსვლელობისთვის. აქციაზე ასევე მიტანილი ჰქონდათ ცოცხები. 

აღნიშნულ ინციდენტამდე „ქართველთა მარშის“ ერთ-ერთმა ორგანიზატორმა სანდრო ბრეგაძემ მის მხარდამჭერებს მოუწოდა, გაეთვალისწინებინათ საქართველოს საპატრიარქოს თხოვნა და არ გაემართათ აქცია აღმაშენებლის გამზირზე, თუმცა „ქართველთა მარშის“ ერთი ნაწილი მის მოწოდებას არ დაეთანხმა.

საქართველოს საპატრიარქომ კვირას, დღის მეორე ნახევარში მოუწოდა „ქართული მარშის“ და „ევროპული საქართველოს“ ლიდერებს თავი შეეკავებინათ დაგეგმილი აქციებისაგან და ამით აერიდებინათ დაპირისპირება.

ამ დროისთვის „ევროპული საქართველოს“ მიერ მოწყობილი აქცია დასრულებულია, თუმცა აქციის მონაწილეთა ერთი ნაწილი მარჯანიშვილის მოედანთან რჩება, შესაბამისად, აღმაშენებლის გამზირზე ავტოსატრანსპორტო მოძრაობა ჯერ არ აღდგენილა. ადგილზე რჩებიან პოლიციის ძალებიც.