საქართველოს ფინანსთა სამინისტროს საგამოძიებო სამსახურმა, დიდი ოდენობით სახელმწიფო თანხების თაღლითურად დაუფლების და ყალბი ოფიციალური დოკუმენტების დამზადება-გამოყენების ფაქტზე, შპს „ვესტა“- ს დამფუძნებელი და დირექტორი ალექსანდრე მანელაშვილი და მისი თანამზრახველი, გოჩა ვაშკლევიჩი დააკავა.


საგამოძიებო სამსახურის ცნობით, დადგენილია რომ შპს „ვესტა“-მ, ტენდერში გამარჯვების გზით, მცხეთის რაიონის სოფელ ქსოვრისში წყლის მრიცხველების მონტაჟის სამუშაოების შესრულებაზე ვალდებულება აიღო.


აღნიშნულმა პირებმა სახელშეკრულებო ვალდებულება დაარღვიეს და სამუშაოები კონტრაქტით გათვალისწინებული პირობებით არ შეასრულეს.


გარდა ამისა, თანხის თაღლითურად დაუფლების მიზნით, სამუშაოთა შესრულების ყალბი აქტები, ფორმა N2 დაამზადეს, რომლებშიც ნაცვლად რეალურად შესრულებული სამუშაოებისა, მიუთითეს, რომ თითქოსდა სოფლის გამრიცხველიანება სრულად მოხდა.


საქმეზე გამოძიება საქართველოს სსკ-ის 180-ე და 362-ე მუხლით მიმდინარეობს, რაც თავისუფლების აღკვეთას 6 დან 9 წლამდე ვადით ითვალისწინებს.