ოფიციალური პირების თანახმად, საფრანგეთის სამხრეთ-აღმოსავლეთ მხარეში გაჩენილი ხანძრის შედეგად, წინა ღამით 10,000 ადამიანის ევაკუაცია განხორციელდა.

ასეულობით მეხანძრე იქნა განაწილებული ბორმს-ლეს-მიმოსეს რეგიონთან ახლოს ცეცხლთან საბრძოლველად.

საფრანგეთმა სთხოვა ევროკავშირის წევრ მეზობლებს გამოეგზავნათ სახანძრო ბრიგადები დასახმარებლად.

კუნძულ კორსიკაზე და ხმელთაშუა ზღვის სანაპიროს მიმდებარე ტერიტორიაზე დამწვარია 4,000 ჰექტარი მიწა.

„ამ ადგილას ზაფხულობით მოსახლეობის რაოდენობა სამჯერ იზრდება“, განაცხადა სახანძრო სამსახურის წარმომადგენელმა.

ცეცხლი განსაკუთრებით მძვინვარებს პოპულარულ კურორტ სენ-ტროპეს მიდამოებში.

კორსიკაზე ასობით საცხოვრებელი სახლიდან იქნა მოსახლეობა ევაკუირებული.

საერთო ჯამში, ორშაბათიდან, 4,000-ზე მეტი მეხანძრე ცდილობდა ჩაექრო ხანძარი.

ოფიციალური ცნობების თანახმად, 12 მეხანძრე დაშავდა და 15-მა პოლიციელმა მიიღო კვამლით ინტოქსიკაცია.

როგორც ინგლისელმა ტურისტმა, ლიზა მინოტმა, BBC-სთან განაცხადა, ყველა ტურისტი იქნა ევაკუირებული ღამის ადგილობრივი დროით ორ საათზე. ტურისტებმა ღამე სანაპიროზე გაათიეს, რადგან დასაბანაკებელ ადგილას დარჩენა არ იყო უსაფრთხო.

მანვე განაცხადა, რომ 3,000-მდე ტურისტს მოუწია სანაპიროზე დარჩენა ცივ, ქარიან ამინდში.

ლიზამ აღნიშნა, რომ ხალხი ძალიან დაღლილია და ევაკუირებულ ტურისტებს შორის ახალგაზრდა ბავშვებიც იმყოფებიან.

მან თქვა, რომ დაინახა როგორ იღებდნენ ვერტმფრენები ზღვიდან წყალს და როგორ ბრუნდებოდნენ უკან, „შავი კვამლის აუზში“ სანაპიროზე.

ტურისტების თქმით, ცეცხლს უკვე გაენადურებინა რამდენიმე დასაბანაკებელი ადგილი.