თავდაცვის ინსტიტუციური აღმშენებლობის (DIB) სკოლაში უსაფრთხოების სექტორის საორიენტაციო პროგრამის დასკვნითი ღონისძიება გაიმართა.

DIB სკოლის დირექტორმა თეა ნიკოლაშვილმა კურსის მონაწილეებს სერტიფიკატები გადასცა, სასწავლო პროგრამა შეაჯამა და მასში ჩართულ უსაფრთხოების სექტორის წარმომადგენლებს კურსის წარმატებით დასრულება მიულოცა.

თავდაცვის სამინისტროს ცნობით, ორი თვის განმავლობაში კურსის ფარგლებში ათი მოდული ჩატარდა. პროგრამა მოიცავდა სალექციო კვირეულებს, კურსებსა და ტრენინგ-მოდულებს, ასევე გასვლით ტურს უსაფრთხოების სექტორის სხვადასხვა უწყებაში.

„მოდულების ფარგლებში მსმენელებმა შემდეგი თემები განიხილეს: ეროვნული, რეგიონული და საერთაშორისო უსაფრთხოების თანამედროვე გამოწვევები, ეროვნული უსაფრთხოების სამართლებრივი საფუძვლები, ეფექტური კომუნიკაცია, უსაფრთხოების სექტორში გენდერის მნიშვნელობა, კონფლიქტური სიტუაციების მართვა და მოლაპარაკებების წარმოება, კორუფციის რისკები, ჰიბრიდული ომი და სხვა საკითხები.

სასწავლო პროგრამა, ასევე მოიცავდა დისტანციური სწავლების ორ კომპონენტს - ნატოს საორიენტაციო და კიბერუსაფრთხოების საბაზისო კურსებს. საორიენტაციო კურსი უსაფრთხოების სექტორის 240-მდე წარმომადგენელმა გაიარა", აღნიშნულია თავდაცვის სამინისტროს მიერ გავრცელებულ ინფორმაციაში.