პაკისტანის პრემიერ მინისტრი ნავაზ შარიფი ქვეყნის უზენაესი სასამართლოს მიერ მის მიმართ გამოტანილი განაჩენის შემდეგ თანამდებობიდან გადადგა.
პაკისტანის უზენაესმა სასამართლომ ქვეყნის პრემიერ მინისტრს, ნავაზ შარიფს საჯარო სამსახურში თანამდებობის დაკავების უფლება მას შემდეგ ჩამოართვა, რაც მის მიმართ კორუფციის ბრალდებით გამოძიება წარიმართა.
სასამართლოს განაჩენი 2015 წელს პანამის დოკუმენტების გამჟღავნებასთან კავშირშია და შარიფის ოჯახის სიმდიდრეს, კერძოდ მისი შვილების ოფშორულ კომპანიებთან კავშირებს ეხება.
პრემიერ მინისტრი შარიფი აღნიშნულ საქმეში ყოველთვის უარყოფდა რაიმე კანონდარღვევას.
გადაწყვეტილება სასამართლოს ხუთკაციანმა კოლეგიამ ერთსულოვნად მიიღო. „როიტერსის“ ცნობით, უზენაესი სასამართლოს ერთ-ერთმა მოსამართლემ ეჯაზ აფზალ ხანმა განაცხადა, რომ შარიფს უკვე აღარ აქვს „უფლება, იყოს პარლამენტის ნამდვილი წევრი“.
პაკისტანის შინაგან საქმეთა მინისტრმა ჩაუდჰრი ალი ხანმა უფრო ადრე ურჩია შარიფს, რომ მიეღო სასამართლოს პარასკევის ვერდიქტი.
BBC-ის ცნობით, სასამართლო ანტიკორუფციულ საქმეებს რამდენიმე ინდივიდის, მათ შორის ნავაზ შარიფის, მისი ქალიშვილის მარიემის და სიძის, საფდარის, ფინანსთა მინისტრის იშაყ დარის და სხვების წინააღმდეგ განიხილავდა.
შარიფს, რომელიც რეკორდული, მესამე ვადით მსახურობდა ქვეყნის პრემიერ მინისტრად, ერთ წელიწადზე ნაკლები დრო აცილებდა გამხდარიყო პირველი პრემიერ მინისტრი პაკისტანის ისტორიაში, რომელიც თანამდებობაზე სრული ვადით იქნებოდა.
იგი პრემიერ მინისტრის პოსტზე 1990 წლის ნოემბრიდან 1993 წლის ივლისამდე და 1997 წლიდან 1999 წლის ოქტომბრამდე, მანამ მსახურობდა, სანამ უსისხლო სახელმწიფო გადატრიალების შედეგად ჩამოაგდებდნენ.
არც ერთ სამოქალაქო პრემიერ მინისტრს პაკისტანში 5-წლიანი ვადა არ დაუსრულებია.
2016 წელს პანამის დოკუმენტების გამჟღავნების შედეგად გაირკვა, რომ შარიფის სამი შვილი ფლობდა ოფშორულ კომპანიებს და აქტივებს, რომლებიც ოჯახის ქონებრივ დეკლარაციაში არ ყოფილა ნაჩვენები.
კომპანიები, რომლებიც არ იხდიდნენ გადასახადებს, სავარაუდოდ, ოფშორულ თანხებს იყენებდნენ უცხოური ქონებების, მათ შორის ლონდონის მეიფეარის მიმდებარედ „პარკ ლეინის“ გასწვრივ საცხოვრებელი სახლების შესაძენად,იუწყება BBC.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIAN.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
ამერიკის შეერთებული შტატების არჩეულმა პრეზიდენტმა დონალდ ტრამპმა ჯანდაცვისა და სოციალური მომსახურების მდივნად ვაქცინაციის მიმართ სკეპტიკურად განწყობილი რობერტ ფიცჯერალდ კენედი უმცროსი, პრეზიდენტ ჯონ კენედის ძმისშვილი დაასახელა, რითაც დაასრულა დიდი ხნის მითქმა-მოთქმა კენედის გარშემო იმის შესახებ, თუ რა თანამდებობას დაიკავებდა იგი ტრამპის ადმინისტრაციაში.