ასპინძის მუნიციპალიტეტში ძირძველი მესხური ვაზის ჯიშები დაახლოებით 25 ჰექტარზე გაშენდა და პირველი მოსავლის მიღებას 2018 წელს ელოდებიან. როგორც ასპინძის გამგებელი ლევან ცაბაძე აცხადებს, მესხური ღვინო არა მარტო ქართულ, არამედ საერთაშორისო ბაზრებზეც გავა.

(ფოტოზე: ასპინძის მუნიციპალიტეტის გამგებელი ლევან ცაბაძე)

„მე გამიმართლა, რომ მესხური ტერასების აღდგენა და ძირძველი მესხური ვაზის ჯიშების გაცოცხლება ჩემი გამგებლის პოსტზე ყოფნის პერიოდში დაიწყო. მესხეთში ვაზი აღარ არსებობდა ფაქტობრივად და კეთილი ხალხის კეთილი ნებითა და ინტერესით დაიწყო აღორძინება - „თი-ბი-სი“ ჯგუფის დაფინანსებით და ასეთი პიროვნება არსებობს - გიორგი ნათენაძე, რომელიც დიდი ხანია ამ საკითხით არის დაინტერესებული. სწორედ მან შეძლო ამ ხალხის დაინტერესება და დაახლოებით, ტერასები 25 ჰა-ზე გაშენდა. ამის წამბაძველობით, პირადად მეც ტერასები მაქვს ეზოში და მესხური ვაზი მაქვს დარგული. უამრავმა ადგილობრივმა დაიწყო ამის კეთება, ასე რომ, სულ მალე ღვინის ბაზარს მესხური ღვინოც შეავსებს. პირველ მოსავალს ველოდებით მომავალ წელს. ბევრი ტერასი მამა-პაპისეულია და ადგილობრივებს აქვთ დარეგისტრირებული და დაიწყეს მომზადება ვენახის გასაშენებლად. ანუ „თი-ბი-სი“ ჯგუფმა და გიორგი ნათენაძემ კარგი მაგალითი მისცეს სხვებს ამ ტერასების აღდგენით და იქ მესხური ვაზის გაშენებით. აქვე აპირებენ მარნის გაკეთებას და შესაბამისად, ღვინის გაკეთებას. მესხური ღვინო არამხოლოდ ქართულ, საერთაშორისო ბაზრებზეც გავა“, განუცხადა GUARDIAN.GE-ს ლევან ცაბაძემ.