ერთიან ეროვნულ გამოცდებზე მიღებულ ქულათა მიხედვით საუკეთესო შედეგების მქონე ტყიბულელ სტუდენტს, უჩა ჩიტიძეს ტყიბულისა და თერჯოლის გაერთიანებული ოლქის მაჟორიტარი დეპუტატის, ელგუჯა გოცირიძის სტიპენდია დაენიშნა.

დეპუტატი ტყიბულში განათლებისა და მეცნიერების სამინისტროს ადგილობრივი ტერიტორიული ორგანოს საგანმანათლებლო რესურს-ცენტრისა და ტყიბულის მუნიციპალიტეტის გამგეობის ორგანიზებით გამართულ ღონისძიებას დაესწრო, რომლის რომლის ფარგლებშიც სამადლობელი სიგელებითა და მედლებით 2015-2016 სასწავლო წლის წარჩინებული 24 მოსწავლე დაჯილდოვდა.

ელგუჯა გოცირიძის „ფეისბუქის" ოფიციალურ გვერდზე გავრცელებული ინფორმაციის თანახმად, დეპუტატს უყურადღებოდ არც პედაგოგები დაუტოვებია, სოლიდური ფულადი პრიზებით ის მასწავლებლები დაჯილდოვდნენ, რომელთა სადამრიგებლო კლასშიც მედალოსანი მოსწავლეები ირიცხებდონენ.

„საოცრად მსიამოვნებს ამ ღონისძიებაზე დასწრება. ძალიან დიდი მადლობა მინდა გადავუხადო მის ორგანიზატორებს! ჩემი აქ ჩამოსვლის მიზეზი და მიზანი არის ერთადერთი: სრული მხარდაჭერა გამოვუცხადო იმ ბავშვებს, მოსწავლეებს, სტუდენტებს, რომლებიც სწავლითა და მონდომებით გამოირჩევიან, რომელთა იმედიც შეიძლება ჰქონდეს ამ ქვეყანას და მათ შორის მეც, როგორც ამ ქვეყნის ერთ-ერთ მოქალაქეს. მახარებს და მაიმედებს ასეთი ახალგაზრდების სიმრავლე ჩვენს ქვეყანაში", განაცხადა ელგუჯა გოცირიძემ, რომელმაც ტყიბულში, ბიუროს ოფისში ადგილობრივებთან შეხვედრაც გამართა.

„მაჟორიტარი დეტალურად გაეცნო მოქალაქეთა პრობლემებს, რომელთა შორის ყველაზე აქტუალური კვლავ დასაქმების, ჯანდაცვისა და სოციალური საკითხები იყო.

დეპუტატის ბიურომ შეხვედრის დროს გამოკვეთილ პრობლემურ და აქტუალურ საკითხებზე მუშაობა უკვე დაიწყო", ნათქვამია გოცირიძის „ფეისბუქის" გვერდზე გავრცელებულ ინფორმაციაში.