იყო ძალიან პროდუქტიული შეხვედრა, იყო ძალიან გულწრფელი, ღია და მეგობრული, ასე აფასებს აშშ-ის ვიცე პრეზიდენტთან, მაიკ პენსთან გამართულ შეხვედრას „შენების მოძრაობის” დამფუძნებელი და თავმჯდომარე დავით უსუფაშვილი.

მისი თქმით, „ვიცე პრეზიდენტის ვიზიტი ესტონეთში, საქართველოში, მონტენეგროში ეს ნიშნავს სწორედ დემოკრატიული სამყაროს აღმოსავლეთ საზღვრების გაძლიერების მცდელობას".

„ყოველგვარი საუბრები რომ ამერიკას აღარ სცალია დანარჩენი მსოფლიოსთვის, საუბრები იმაზე, რომ საქართველო ქრება დემოკრატიული სამყაროს რადარებიდან, საუბრები იმის თაობაზე, რომ რუსეთთან ურთიერთობის კონტექსტში შესაძლოა, ამერიკის შეერთებულმა შტატებმა საქართველოსადმი ყურადღება შეასუსტოს, ან პოზიციები შეარბილოს, ეს არის აბსოლუტურად უსაფუძვლო. ვიცე პრეზიდენტის ვიზიტი ესტონეთში, საქართველოში, მონტენეგროში ეს ნიშნავს სწორედ დემოკრატიული სამყაროს აღმოსავლეთ საზღვრების გაძლიერების მცდელობას, ეს არის ნატოს საზღვრების გაძლიერების მცდელობა და საქართველომ, ჩვენ ყველაფერი უნდა გავაკეთოთ იმისთვის, რომ ამ კონტექსტში კიდევ უფრო მეტად ჩავეწეროთ. აშშ-ის ვიცე-პრეზიდენტს შევთავაზე და შევთანხმდით შემდეგ ფორმულაზე - თუკი მათი მხრიდან არის USA - first, Georgia next ჩვენი მხრიდან იქნება, Georgia first – USA next – ჩვენ ამაზე შევჯერდით. საქართველო ვერ იქნება ვერც დაცული და ვერც დემოკრატიული, თუ საქართველო არ იქნა ეკონომიკურად ძლიერი თუ ჩვენმა მოქალაქეებმა არ ნახეს კეთილი გავლენა, ანუ მათ კეთილდღეობაზე თუ არ აისახა ეს ყველაფერი. ამ მიმართულებით ბევრი რამ არის გასაკეთებელი. დემოკრატიული სტანდარტების დაცვაზე რა თქმა უნდა, ძალიან ბევრი ვიმსჯელეთ. მე აღვნიშნე, რომ საქართველოს აქვს სერიოზული პრობლემა ამ თვალსაზრისით, მაგრამ გვქონდა უფრო დიდი პრობლემები რამდენიმე წლის წინ ანუ ჩვენი ამოცანაა, რომ ვიაროთ წინ და არ ვედრებოდეთ წინა ხელისუფლებას", განაცხადა დავით უსუფაშვილმა.