საქართველოს ყოფილი პრეზიდენტი მიხეილ სააკაშვილი მიიჩნევს, რომ მის მიერ ძლიერი უკრაინისთვის ბრძოლა „ყველაზე მოკლე გზა არის საქართველოს გადასარჩენად“ და „ეს არ არის ის შემთხვევა, როცა ქართველი ყოფილი ლიდერები მიდიოდნენ უცხოეთში და დგებოდნენ მტრული სახელმწიფოების სამსახურებში - როგორც სტალინი, როგორც ბევრი სხვა“.

„ამერიკის ხმისთვის“ მიცემულ ინტერვიუში, შეკითხვაზე - თქვენ ცოტა ხნის წინ თქვით, რომ არ გინდათ უკრაინამ იფიქროს, რომ მიატოვეთ. ფიქრობთ თუ არა, რომ ქართველი ხალხის ის ნაწილი, რომელიც თქვენ გიჭერთ მხარს, რაღაც მომენტში მიატოვეთ უკრაინაში წასვლით? - სააკაშვილმა უპასუხა:

„საქართველოში მე დავამთავრე ორი საპრეზიდენტო ვადა და გავუკეთე უფრო მეტი საქართველოს, ვიდრე საქართველოს ძალიან ბევრ მმართველს გაუკეთებია ძალიან ბევრი საუკუნის განმავლობაში. ამიტომ მე ამ საყვედურებს ვერ მივიღებ. მე საქართველოს არასოდეს მივატოვებ იმიტომ, რომ საქართველო ჩემი ცხოვრების არსია, ჩემი გულია. თუმცა მიმაჩნია, რომ ძლიერი უკრაინა ყველაზე მოკლე გზა არის საქართველოს გადასარჩენად და ეს არის ჩემი ბრძოლა დღეს. ამ ბრძოლაში მე ვხედავ უსაშველოდ დიდ შესაძლებლობას. გარდა ამისა, ეს არ არის ის შემთხვევა, როცა ქართველი ყოფილი ლიდერები მიდიოდნენ უცხოეთში და დგებოდნენ მტრული სახელმწიფოების სამსახურებში - როგორც სტალინი, როგორც ბევრი სხვა. ამ შემთხვევაში ისე ემთხვევა საქართველოსა და უკრაინის ინტერესები, და ეს იმდენად იგივე ფრონტია ჩემთვის, რომ საერთოდ არანაირი ინტერესთა კონფლიქტი არ არის. პირიქით, ეს არის საქართველოს ინტერესებისთვის ბრძოლის გაძლიერება“, განაცხადა მიხეილ სააკაშვილმა.