საქართველოს საგარეო საქმეთა ყოფილი მინისტრი, „ნაციონალური მოძრაობის“ წევრი გრიგოლ ვაშაძე მცოცავ ოკუპაციასთან დაკავშირებით, შრომის, ჯანმრთელობისა და სოციალური დაცვის მინისტრის, დავით სერგეენკოს მიერ გაკეთებულ განცხადებას ეხმაურება.

როგორც საგანგებოდ გამართულ ბრიფინგზე ვაშაძემ განაცხადა, სერგეენკოს „ნაბოდვარი“, რომ რუსეთის ქმედებების აღწერისას, ტერმინი „მცოცავი ოკუპაციის“ გამოყენება სწორი არ არის, საქართველოს დელეგაციებს საერთაშორისო ორგანიზაციებში და ჟენევის კონსულტაციებზე წინ დახვდებათ.

„მისი ერთი ფრაზიდან, უგუნური, უმეცარი და მავნებლური ფრაზიდან, რომელიც ზიანს აყენებს საქართველოს საგარეო პოლიტიკურ ინტერესებს, ჩვენ გავიგეთ ჯერ ერთი, რომ რუსეთი არ ახორციელებს მცოცავ ოკუპაციას, მეორე ის, რომ თურმე ე.წ. ცხინვალის რეგიონს, ე.წ. სამხრეთ ოსეთს აქვს საზღვრები და მესამე ის, რომ 2008 წელს ომი დაიწყო საქართველომ და კერძოდ, „ნაციონალურმა მოძრაობამ". ამ ყველა უბედურებიდან ერთი კარგი რაღაც გამოდის ის, რომ ჩვენ ვგებულობთ რაზე ლაპარაკობენ დღევანდელი ხელისუფლების წევრები ერთმანეთთან დახურული კარის მიღმა. არ ვიცი, როგორ ისჯებიან პატივცემული მინისტრები ამ ხელისუფლების დროს, მაგრამ თუ არ დასჯიან ერთი თხოვნა გვაქვს როგორც რიგით მოქალაქეებს - ლაპარაკი მაინც აუკრძალონ იმიტომ, რომ ეს ნაბოდვარი საქართველოს დელეგაციებს საერთაშორისო ორგანიზაციებში და ჟენევის კონსულტაციებზე წინ დახვდებათ“, განაცხადა გრიგოლ ვაშაძემ.