„ირაკლი ღარიბაშვილმა ჩემთვის მოცემული პირობა შეასრულა“, – ამის შესახებ ძებნილმა თემურ ბასილიამ „კვირის ქრონიკას“ განუცხადა. ყოფილი მაღალჩინოსანი ამბობს, რომ ადამიანის უფლებათა დაცვის კომიტეტმა მისი საქმე შეისწავლა და დადგინდა, რომ საქმეში არსებობს პოლიტიკური მოტივით დევნის ფატები.

 
„კომიტეტმა შარშან მიმართ პროკურატურას, გადაეხედათ ჩემი საქმისთვის. თუმცა, ის, რაც პროკურატურაში ხდება, უცნაურია. თითქმის წელიწადი და 2 თვე გავიდა პრემიერის დაპირებიდან და პროკურატურას არ მიუყვანია ეს საქმე ბოლომდე. ჩემთვის ასევე გაუგებარია, რატომ აფარებს ხელს დამნაშავეებს პროკურატურა. – მათ, ვინც სააკაშვილის დროს საქმეებს თითხნიდნენ. იმედია, პროკურატურაში ახლად შექმნილი დეპარტამენტი დეტალურად შეისწავლის ამ სიტუაციას და ყველაფერს თავის სახელს დაარქმევს“, – განაცხადა ბასილიამ.