ვენესუელაში ამერიკის შეერთებული შტატების შესაძლო სამხედრო ინტერვენციას ვენესუელას თავდაცვის მინისტრმა, ვლადიმირ პადრინომ „სიგიჟე“ უწოდა და თქვა, რომ „ეს არის უმაღლესი ექსტრემიზმის აქტი“. მან აღნიშნა, რომ შეერთებულ შტატებს „ექსტრემისტული ელიტა“ მართავს, როგორც ამას Reuters-ი და The New York Times-ი წერენ.

კომუნიკაციების მინისტრმა ერნესტო ვილეგასმა განაცხადა, რომ „ვენესუელასადმი იმპერიულ მუქარას“ ოფიციალურ პასუხს საგარეო საქმეთა სამინისტრო გასცემს.

„დიპლომატიური წარმომადგენლები გამოძახებულნი არიან საგარეო საქმეთა სამინისტროში და ვენესუელასადმი იმპერიული საფრთხის თაობაზე უწყების მიერ კომუნიკე იქნება გამოქვეყნებული“, განაცხადა ერნესტო ვილეგასმა „თვითერზე“.

ამერიკის შეერთებული შტატების პრეზიდენტმა, დონალდ ტრამპმა პარასკევს არ გამორიცხა, რომ ვენესუელას კრიზისი სამხედრო გზით გადაწყვიტოს.

„ხალხი იტანჯება და კვდება“, განაცხადა ტრამპმა.

პრეზიდენტ ნიკოლას მადუროს ახალი საკონსტიტუციო ასამბლეა ფართოდ იქნა გაკრიტიკებული, როგორც ანტი-დემოკრატიული. შეერთებულმა შტატებმა ახლახან მადუროს დიქტატორი უწოდა და მასზე სანქციები დააწესა.

„ჩვენ ბევრი არჩევანი გვაქვს ვენესუალისთვის, მათ შორის შესაძლო სამხედრო არჩევანი, თუ საჭირო იქნება“, უთხრა ტრამპმა რეპორტიორებს პარასკევ საღამოს.

„ჩვენ ჯარები მთელი მსოფლიოს ნაწილებში, რომელიც ძალიან შორს არის ჩვენგან, სრულ მზადყოფნაში გვყავს. ვენესუელა არ არის ძალიან შორს და ხალხი იტანჯება და კვდება“.

მოგვიანებით თეთრმა სახლმა განაცხადა, რომ პრეზიდენტმა მადურომ ტრამპთან სატელეფონო ზარის განხორციელება ითხოვა, პასუხად კი თეთრი სახლიდან მიიღო შემდეგი: ტრამპი სიამოვნებით დაელაპარაკება მის ვენესუელელ კოლეგას, როცა ქვეყანაში დემოკრატია აღდგება.